Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Historia


El Festival remanez nel añu 1963. Al principiu foi una iniciativa del Ayuntamientu de Gijón/Xixón cola collaboración de la Caxa d’Aforros d’Asturies (güei Cajastur). Angüaño estes entidaes siguen tando nel certame, la primera como organizadora y la segunda como una de les patrocinadores.

El primer añu que se celebró, recibió’l nome de Certame Internacional de Cine y TV Infantil. Ente 1964 y 1968 conservó’l mesmu nome, anque camudando la parte cabera "infantil" por "pa neños". Ente 1969 y 1976, dexaron d’apaecer nel nome oficial del certame les sigles TV. A partir de 1977 y hasta 1987 (con pequeñes diferencies en 1984, 1986 y 1987) usó’l nome de Certame Internacional de Cine pa la Infancia y la Mocedá y yá en 1986 entamó a anteponer el de Festival Internacional de Cine de Xixón, denominación que s’afitó na edición del añu 1988. Los sos anicios como festival pa la infancia y la mocedá espliquen l’especial enfotu qu’esti festival tien siempre pacol públicu más mozo. Tolos años hai un xuráu mozo ente 17 y 25 años, que s’escueye ente los que lo soliciten.

L’actual direutor, Nacho Carballo, foi nomáu en 2012 sustituyendo a José Luis Cienfuegos.

Esta entidá ocúpase de la xestión del Teatru Xovellanos, de la estaya de Festexos de la ciudá y tamién de la organización del Festival Internacional de Cine de Xixón.

Nos caberos años pasaron pel Festival de Xixón dalgunos de los más renomaos profesionales del cine independiente a nivel mundial. Visitaron esti festival como direutores agasayaos, ente otros, Abbas Kiarostami, Aki Kaurismäki, Todd Haynes, Pedro Costa, Paul Schrader, Joao Cesar Monteiro, Seijun Suzuki, Jem Cohen, Kenneth Anger, Ulrich Seidl, Hal Hartley, Lukas Moodysson, Tsai Ming-liang, Claire Denis o Todd Solondz y tamién taben profesionales nacionales ya internacionales nel xuráu internacional o presentando películes en delles estayes del programa: John Cale, Maria Schneider, Monte Hellman, Paprika Steen, Julio Medem, Fele Martínez, Elvira Mínguez, Jorge Perugorría, María Esteve, Tristán Ulloa, Daniel Guzmán o Jan Cvitkovic.

Al tiempu de la celebración del Festival Internacional de Cine de Xixón faense cursos, meses redondes, alcuentros colos direutores y conciertos diarios, amás de fiestes con música en direuto.

El Festival concede dellos premios nes distintes estayes competitives del programa contando con un Xuráu Internacional (formáu por, al menos, cinco profesionales de distintos países), un Xuráu Mozo (formáu por 10/15 rapazos d’ente 17 y 25 años) y, dende 2005 un Xuráu FIPRESCI, collaborando al tiempu n’otres iniciatives col envís de promover la industria cinematográfica n’Asturies.