Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

CINCO LLARGUMETRAXES REALIZAOS POR MUYERES FORMEN EL NÚCLEU DE LLENDES,

LA SEICIÓN MÁS VANGUARDISTA DEL 56 FICX

Votos

(Total de votos recibidos 7)

(Puntuación 0)

cold
La vida nos márxenes de la gran ciudá, los roles de xéneru, les llendes ente realidá y ficción o el conflictu ente pasáu y presente, nun espaciu que va traer a Xixón dellos estrenos mundiales

Mayoría de nomes femeninos nun terrén tradicionalmente masculín. La 56ª Edición del Festival Internacional de Cine de Xixón faise ecu del rescamplíu de muyeres cineastes que, na mayor parte de los casos, autoprodúcense y tán consiguiendo anovar nel llinguaxe cinematográficu. Sobreponiéndose a la dificultá d’algamar presupuestos del mou tradicional, esi cine fechu na frontera de lo narrativo supón pa les nueves direutores una ventana de visibilidá del so talentu. Siguiendo’l camín de precursores del nivel de Maya Deren, Chantal Akerman o Forugh Farrojzad, les creadores d’imáxenes más renovadores del panorama nacional d’anguaño van adueñase de les pantalles xixoneses del 16 al 24 de payares. Ocho llargumetraxes, dalgunos d’ellos d’estrenu mundial, y siete curtiumetraxes igüen un espaciu únicu pa conocer les llendes del audiovisual contemporáneu.

Estes son les películes que, a falta de zarrar definitivamente’l programa, formen la seición:

Game Girls (Alina Skrzeszewska, 2018) La direutora polaca torna al FICX dempués de presentar Songs from The Nickel. Teri y Tiahna tenten de vivir el so amor nos infernales suburbios de la ciudá de Los Ángeles. La violencia, les armes y la droga marquen la rutina d’una rellación que llogra sobrevivir nun entornu que s’alimenta, tolos díes, de víctimes como les dos protagonistas nueses. Presentada internacionalmente na Seición Panorama de la Berlinale 2018.

Casanovagen (Luise Donschen, 2018) La figura paradigmática del conquistador, exemplificada nel aventureru venecianu Giacomo Casanova, val-y bien como símbolu a la realizadora alemana Luise Donschen pa esti estudiu sobre la identidá, la sexualidá y los roles de xéneru na sociedá del sieglu XXI. Protagonizada por John Malkovich, preséntase por primer vegada n’España en collaboración col Festival Zinebi.

El zoo (Gemma Blasco, 2018) ¿Cuála ye la llende ente’l personaxe y l’actor encargáu d’interpretalu? ¿Y ente la obra que dispón un creador y la forma na que la observen les y los espeutadores tres de pasar pol filtru de quien la representa? Gemma Blasco robla la so ópera prima, un ensayu sobre les llendes de la representación y los homes y muyeres que la protagonicen.

The Rare Event (Ben Russell, Ben Rivers 2018) Dos collaboradores yá avezaos, y tamién conocíos de vieyo del FICX, roblen esta obra que constitúi una puesta n’escena que tenta de dar rempuesta a una entruga clave del nuesu tiempu: ¿Hasta qué puntu se puede resistir? Una figura verde que nos amoria como símbolu de la interrupción del discursu racional, y la búsqueda de la representación física de los procesos mentales, son dos de los finxos básicos sobre los que Russell y Rivers construyen el so edificiu cinematográficu. Estrenu n’España.

Muga deitzen da pausoa (Maider Oleaga, 2018) L’alcuentru de dos muyeres nuna casa vieya de Donostia marca la conexón ente’l presente y el pasáu, ente la vida y la muerte. Una d’elles ye cineasta, la otra foi una pedagoga vasca que finó en 1982. La conocencia como necesidá, lo performativo como mediu. La direutora bilbaína Maider Oleaga robla esti llargumetraxe sobre la búsqueda y los raigaños. Estrenu Mundial nel FICX.

Lurralde Hotzak (Iratxe Fresneda, 2018) Un viaxe xeográficu y un viaxe al traviés de les imáxenes. Paisaxes qu’observar y que charren colos paisaxes yá observaos nel cine de Theo Angelopoulos, Bego Vicario, Ruth Hillarp o Wim Wenders. Llendes del 56 FICX va vivir l’estrenu mundial del segundu llargumetraxe d’Iratxe Fresneda, dempués de debutar con Irrintziaren Oihartzunak col que percorrió festivales como San Sebastián, Nantes, Nyon o São Paulo.

La casa lobo (Cristóbal León, Joaquín Cociña, 2018) Ganadora del Premiu Caligari de la Seición Forum de la Berlinale 2018 y d’una Mención Especial nel Festival d’Annecy. L’animación ye’l mediu escoyíu polos dos cineastes chilenos pa contar una fábula poderosa, basada nos fechos reales asocedíos en Colonia Dignidad, sobre’l poder de les sectes, l’abusu de los poderosos y el monopoliu de la información.

Le vrai film est ailleurs (Mark John Ostrowski, 2018) El direutor estáuxunidense residente n’Asturies, Mark John Ostrowski torna al FICX col estrenu mundial del so llargumetraxe nuevu. El retratu de tres personaxes que, na so fotografía naturalista en blanco y negro y nel refináu costumismu de los diálogos que comparten, recuerden al cine del direutor francés Philippe Garrel.

Xunto a estos llargumetraxes, Llendes tamién nos permite averanos a una seleición d’obres de menor duración pero d’interés asemeyáu, que completen la programación de la seición de la muestra xixonesa. Obres como Interraíl/Mahnmal, del direutor asturianu Tito Montero, onde s’analiza la bayura d’imáxenes surdíes de les teunoloxíes nueves al rodiu de sitios emblemáticos ya históricos, o A Creak in Time, un viaxe psicodélicu al espaciu esterior pel que nos guía Steven McInerney, un espaciu esterior que tamién retrata Minha Park na so obra Cosmic Kaleidoscope. Estes películes formen parte d’una sesión especial llamada “Inner & Outer Space” xunto a Endeavour de Johann Lurf, cineasta gallardonáu pol 56 FICX.

Miguel Ángel Blanca va volver al FICX con Corre brilla luz luz dempués d’esmenanos l’añu pasáu col so llargumetraxe Quiero lo eterno y Ben Rivers va tar presente tamién nesti formatu col estrenu n’España del so curtiumetraxe Trees Down Here. Ana Català va facer un homenaxe a les intelectuales escaecíes de Llatinoamérica con Todas íbamos a ser reinas.

Palabras clave Festival de Cine, 2018