Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

JUAN DIEGO, PREMIU NACHO MARTÍNEZ

ESTHER GARCÍA, PREMIU MUYER DE CINE

Votos

(Total de votos recibidos 24)

(Puntuación 2,90)

je
El 56FICX va entregar el premiu al actor na gala d’apertura y la productora va recibilu na de pieslle.
  • Juan Diego, Premiu Nacho Martínez 2018
El Premiu de Cinematografía Nacho Martínez, bien prestixosu, lleva esti añu’l nome de Juan Diego (Bormujos, Sevilla, 1942). L’esperimentáu actor sevillanu, que lleva nel oficiu yá 52 años, ye ún de los intérpretes más conocíos y apreciaos n’España, tanto nel cine como nel teatru (pudimos velu apocayá actuando como patriarca n’Una gata sobre un teyáu de zinc caliente, el clásicu de Tennessee Williams) o na televisión (Padre Coraje o Los hombres de Paco). L’intérprete xúnese a una llista llarga de profesionales que ganaron el gallardón n’otres ediciones, como Verónica Forqué, José Sacristán, Montxo Almendáriz, Charo López, Ángela Molina, Maribel Verdú y Marisa Paredes. Juan Diego va recibir el Premiu Nacho Martínez na gala d’apertura del 56FICX.

Juan Diego entamó na profesión na década de los sesenta y, a partir d’entós, trabayó baxo la direición de direutores como Luis García Berlanga, Eloy de la Iglesia, Ettore Scola, José Luis García Sánchez, Mario Camus, Basilio Martín Patino, Fernando Fernán Gómez, Marco Ferreri, Carlos Saura, Bigas Luna, Arturo Ripstein, Pablo Berger, Manuel Gutiérrez Aragón o Agustí Villaronga en títulos bien importantes como La noche Oscura, Cabeza de Vaca, Dragón Rapide, El viaje a ninguna parte, Los santos inocentes, París Tumbuctú, El rey pasmado, Vete de mí, El 7º día, Torremolinos 73, Anochece en la India o, de recién, No sé decir adiós.

Una serie ablucante de collaboraciones tienen llevao a Juan Diego al algame de trés Premios Goya y nueve nominaciones, cinco premios al meyor actor nel Festival de Málaga amás d’otros a la meyor interpretación en festivales perimportantes como la Concha de Plata al Meyor Actor nel Festival Internacional de Cine de San Sebastián (Vete de mí – 2006) o la Espiga d’Oru na Seminci de Valladolid.

Juan Diego ye medaya d’oru al Méritu de les Belles Artes (2006), tamién de l’Academia de les Artes y les Ciencies Cinematográfiques (2015) y tien el títulu de Fíu Adoptivu de la ciudá de Sevilla (2018), amás de ganar premios bien afamaos como l’Ercilla, Fotogramas, Max, Feroz y Unión d’Actores.

Juan Diego axuntóse col actor asturianu desapaecíu Nacho Martínez, que da nome al premiu, nel rodaxe del filme inolvidable de Fernando Fernán Gómez, El viaje a ninguna parte, ún de los títulos más destacaos del cine español y de los más representativos na carrera de Juan Diego.
El Premiu de Cinematografía Nacho Martínez ye una escultura fecha pol artista Jaime Herrero, donada d’un xeitu arrogante al certame.


  • Esther García, Premiu Muyer de Cine 2018
El premiu Muyer de Cine va llevar el nome de la productora Esther García (Cedillo de la Torre, Segovia, 1956), na edición del 2018. García ye productora d’El Deseo, y foi una persona imprescindible na vida profesional del nuestru direutor más internacional, Pedro Almodóvar, pero yá entamara la so carrera muncho enantes de la so rellación col realizador manchegu, al trabayar na producción Pim, pam, pum… ¡Fuego! (1975), dirixida por Pedro Olea. La so carrera foi afitando xunto a direutores del calibre de Fernando Trueba, Emilio Martínez Lázaro, Isabel Coixet o Álex de la Iglesia, ente los que destaca, cómo yá comentáramos, la so collaboración con Almodóvar, un venceyamientu qu’entamó cola película Matador (1985) y que se caltién anguaño.

El trabayu d’Esther García vio la so recompensa al ganar un Premiu Óscar (el de meyor película en llingua non inglesa por Todo sobre mi madre), cuatro Premios Goya de diez nominaciones, tres Premios BAFTA, tres premios Cesar o un David de Donatello entre otros munchos. El reconocimientu caberu, que recibió apocayá, foi’l Premiu Nacional de Cinematografía 2018, nel que se conmemora la so trayeutoria de más de trenta años tanto n’España como internacionalmente, cómo desarrolló un modelu de producción “venceyáu a la independencia autoral” y el so llabor “perautivu afalando a direutores nuevos”, tal y como ta mentao na resolución del premiu.

Esther García ye una muyer que ye quien a algamar les sos metes nun mundu nel que tien predominiu lo masculino y onde, acordies coles sos pallabres “yera bien enguedeyao pa una muyer entrar si nun tabes nun departamentu de maquillaxe, vestuariu o yeres secretaria de producción”. La productora va recibir el Premiu Muyer de Cine na gala de pieslle de la 56 edición del FICX.
Esti premiu, que yá llega a la octava edición, nació al abellugu de Muyeres de Cine col envís de promocionar y visibilizar el trabayu de la muyer na industria cinematográfica española. Esther García xúnese a les realizadores y guionistes Josefina Molina, Cecilia Bartolomé ya Isabel Coixet y la figurinista Yvonne Blake, la montadora Carmen Frías, la representante Katrina Bayonas y l’actriz Mercedes Sampietro, pa completar el premiu Muyer de Cine.


Palabras clave Festival de Cine, 2018