Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

eSposiciones, coloquios, presentaciones de llibros y los vermús ficx del toma 3, nes actividaes COMPLEMENTARIeS de la 55 edición

Votos

(Total de votos recibidos 65)

(Puntuación 3,02)

actividades
* El Centru de Cultura Antiguu Institutu acueye una instalación de la revolucionaria artista VALIE EXPORT y los .gif del coleutivu Visual 404 * Dennis Lim, críticu de cine, programador y componente del Xuráu Internacional, presenta'l so llibru David Lynch. El hombre de otro sitio,
sobre la figura d'unu de los direutores más influyentes del cine actual
* La Universidá d'Uviéu va collaborar col Festival averando a les cineastes al entornu académicu
Una instalación de VALIE EXPORT sobre'l desarrollu civilizador de l'automatización del trabayu, una esposición de GIF, cartelos históricos del FICX, fotos del tapis rouge de Cannes, el llibru David Lynch. El hombre de otro sitio, charres sobre la desigualdá nel sector cinematográficu, y Los Vermús FICX del Toma 3 son dalgunes de les actividaes complementaries de la 55 edición del Festival Internacional de Cine de Xixón.

Esposiciones

Die un -endliche -ähnliche Melodie der Stränge (The un -ending / -ique
melody of cords), VALIE EXPORT

Centru de Cultura Antiguu Institutu, Sala 1, del 17 al 25 de payares

Horarios: 11:00 a 14:00 y de 18:00 a 21:00h

La internacionalmente renomada artista del performance y de los nuevos medios VALIE EXPORT presenta una instalación compuesta por 5 monitores nos que'l primer planu d'una aguya de máquina de coser en funcionamientu, simbolicen el desarrollu civilizador de l'automatización del trabayu, nesti casu, principalmente del trabayu femenín.

.gif; imaxe permanente

CCAI, Sala 2, del 17 al 25 de payares

Horarios:11:00 a 14:00 y de 18:00 a 21:00h

Los GIF (Graphics Interchange Format) convirtiéronse nel formatu estrella del 'meme' como dosis mínima de sentíu cultural, precisos pal humor, la política o l'arte. L'inxenieru Steve Wilhite, programador de Compuserve, creó estos iconos va 30 años. Una instalación comisariada pol coleutivu Visual404 pal 55FICX.

Archivu FICX: Artwork nel Cine de los 90

Sala Astragal, del 17 de payares al 2 d'avientu

Horarios: de llunes a vienres, de 09:00 a 15:00 y de 17:00 a 21:00h -
Sábados 10:00 a 14:00h

Semeyes, flyers, diapositives, pósters, postales... Memoria archivada en caxes qu'agora'l FICX desempolvia p'amosar lo que yera na década de los 90, xusto enantes de que les redes sociales ficieren públicos les alcordances privaes.

Historia del FICX al traviés de los sos cartelos

FNAC (Intu Asturias), del 30 d'ochobre al 25 de payares, llunes a sábadu de 10:00 a 22:00h

CMP Pumarín Xixón-Sur, del 16 al 26 de payares

La retrospeutiva de les imáxenes que fueron bandera del Festival en caúna de les sos ediciones supón un viaxe visual, intelectual y emocional pela so programación, peles sos seiciones, pela so vocación d'estimular al públicu.

70u Festival de Cannes de Macilón Neto

CISLAN, del 15 de payares al 15 d'avientu, llunes a vienres de 9:00 a 21:00h

El Festival de Cannes cumple 70 años y el fotógrafu Macilón Neto presenciólo en direuto. Nesta esposición, enséñanos un reportaxe fotográficu compuestu por distintes series, ente les que destaca 'El tapis rouge' con primeros planos de los artistes en color y Un certain regard con composiciones artístiques en blanco y negro.

Muyeres na Primer Guerra Mundial. Vanguardia y retaguardia

CCAI, Vestíbulu segunda planta, 16 al 25 de payares

Horariu: de 11:00 a 14:00 y de 18:00 a 21:00h

Inauguración: 16 de payares a les 19:30h

Mientres la Gran Guerra (1914-1918), un verdaderu bastiazu de panfletos, caricatures, semeyes, películes y cartelos enllenó los paises belixerantes y desató odios viscerales, no que'l sociólogu alemán Werner Sombart (1863-1941) calificó como "guerra de creencies". L'usu de la imaxe femenina convirtióse nun vehículu afayadizu pa combinar emociones y reforciar los estereotipos patrióticos y sexuales per aciu d'asociaciones inconscientes, pero cargaes d'intenciones.

Los vermús FICX del Toma 3

Del 19 al 24 de payares, 13:30h

El FICX vuelve al Toma 3 nuna especial sesión vermú pa dar oportunidá a persones acreitaes y públicu a charrar ya intercambiar idees colos cineastes convidaos al Festival nun ambiente distendíu y dinámicu.

Amás, nel emblemáticu llocal xixonés va tener llugar la séptima edición PechaKucha 20x20 Xixón, un eventu d'orixe xaponés que se fai a nivel mundial en más de 900 ciudaes. Cada ponente va tener namás 6 minutos y 40 segundos pa desplicar el conteníu de 20 imáxenes (20 segundos por fotografía), lo qu'obliga a quedase colo verdaderamente importante del mensaxe.

Presentaciones de llibros

David Lynch. El hombre de otro lugar, de Dennis Lim.

CICA (Centru d'Interpretación del Cine n'Asturies), 24 de payares, 17:00h

Surrealismu, ética, conceutos del bien y el mal. Too esto se da cita nel llibru David Lynch. El hombre de otro lugar, que va ser presentáu nel FICX pol so propiu autor, Dennis Lim, críticu, profesor y direutor de programación de la Film Society of Lincoln Center de Nueva York. Un averamientu al trabayu d'ún de los direutores más importantes ya influyentes del nuestru tiempu.

Nick Drake. Recuerdos de un instante, de Grabielle Drake y Colly Collomon.

Toma 3, 25 de payares, 13:30h

La vida y la obra del tempranamente fináu Nick Drake resúmese, de forma minuciosa, nesti llibru gracies a la memoria d'aquellos que lu conocieron arriquecíu coles lletres de los sos cantares, cachinos de los sos diarios, entrevistes y otres alcordances. Una auténtica cellebración del mozu músicu inglés de la mano de la so hermana, l'actriz Gabrielle Drake

Coloquios / charres

El FICX na Universidá.

Facultá de Filosofía y Lletres d'Uviéu, 20 y 21 de payares

El Festival y la Universidá d'Uviéu entamen una collaboración nueva averando a les cineastes al entornu académicu. Nes presentaciones va cuntase cola participación de Carla Simón (21/11, a les 13:00h), direutora de Verano 1993, película que representa a España nos Oscar, y de Virginia García del Pino (20/11, a les 16:00h), documentalista y direutora de proyeutos del Máster de Documental Creativu de la UAB. Per parte de la Universidá d'Uviéu, va intervenir la profesora Carmen Pérez Ríu.

(Des)igualdá. Cineastes, profesionales, plataformes y asociaciones

Sala de Conferencies CCAI, 24 de payares, 11:00h

Mesa redonda na que se va debatir al rodiu la (des)igualdá nel sector cinematográficu y audiovisual cola participación de moces cineastes, autores de reconocíu prestixu y representantes de plataformes y asociaciones como Muyeres de Cine y CIMA.

Selmana de la Ciencia 2017 nel Xardín Botánicu Atlánticu

18 y 19 de payares, de 10:00 a 18:00h

El Xardín Botánicu Atlánticu de Xixón celebra la so Selmana de la Ciencia con un programa d'actividaes qu'axunta visites guiaes, talleres y charres, amás de la proyeición del documental Cantábrico (Los dominios del oso pardo) de Joaquín Gutiérrez Acha, incluyendo un coloquiu col so direutor. Amás va poder visitase una esposición con imáxenes ablucantes de los paisaxes
cantábricos, frutu del rodaxe del documental.

Mesa ALMA: El guión na ficción, la non ficción y dende'l puntu de vista de
la docencia

CICA, 23 de payares, 17:00h

Una panorámica sobre l'actualidá del papel del guionista y les claves de la escritura pa obres de ficción, non ficción y dende'l puntu de vista académicu na formación de talentos nuevos y profesionales. Esti alderique ta organizáu en collaboración col sindicatu de guionistes ALMA, qu'en 2017 sumóse al palmarés del FICX col patrociniu del Premiu al Meyor Guión de
Película Española.

El cine rusu, de la revolución al realismu

CICA, 22 de payares, 19:00h

Charra organizada pol CICA y l'Asociación Lázaro Cárdenas en collaboración col FICX y la Sociedad Cultural Gijonesa na que se se va dialogar sobre cómo, tres la Revolución d'Ochobre, el poder soviéticu interesóse pol cine como ferramienta d'educación y propaganda. Sobre la mesa, nomes de
realizadores de la talla de Vertov, Eisenstein, Pudovkin, Kozintsev, Dovjenko o Kuleshov.

Actúa. Frente al oxetivu... sobre les tables

Teatru Alejandro Casona, 23 de payares, 16:00h

L'AISGE (Artistes y Intérpretes, Sociedá de Xestión), entidá patrocinadora de los premios a la Meyor Actriz y al Meyor Actor de la Seición Oficial del FICX, va ufiertar una charra informativa a les alumnes y alumnos de la Escuela Superior d'Arte Dramáticu d'Asturies (ESAD) na que se va analizar el
llabor de promoción y defensa de los derechos d'intérpretes y artistes nel nuestru país, asina como les iniciatives y ferramientes disponibles pa protexer la profesión.

Amás d'estes actividaes, el FICX Industry Days va acoyer delles charres y alcuentros abiertos al públicu. Pa más información, consultar esti enllaz: <http://www.gijonfilmfestival.com/page/18025-ficx-industry-days>
Palabras clave Festival de Cine, 2017