Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

ESPERIMENTACIÓN, ANIMACIÓN Y UNA ESBILLA DE LOS TÍTULOS MÁS INTERESANTES DEL AÑU NES SEICIONES PARALELES DEL 55FICX

Votos

(Total de votos recibidos 28)

(Puntuación 3,17)

esbillaytal

· Les seiciones d'Esbilla y Llendes apuesten pol cine español y asturianu más nuevu cola programación de producciones arriesgaes y sorprendentes
· AnimaFICX va ufrir una esbilla fecha con procuru de los títulos más aplaudíos pola crítica y, dellos, van ser estrenos nacionales


La 55 Edición del Festival Internacional de Cine de Xixón presenta les seiciones de Llendes, Esbilla y AnimaFICX más híbrides de los últimos años, trés programes, cola so propia personalidá y carauterístiques, cargaos d'estrenos nacionales. Esta bayura va acoyer a los distintos espectadores qu'acuden al FICX cada añu, dende los amantes de l'animación xaponesa hasta aquellos que busquen les narraciones más radicales y heteroxenees, de los que quieren alcontrar los trabayos más sorprendentes a los qu'aspiren a ver nel festival aquelles obres que fueron allabaes por crítica y públicu n'otros certámenes internacionales. A falta de zarrar el programa definitivu d'estes seiciones, el FICX adelanta una seleición arriesgada y sorprendente.

LLENDES
Llendes n'asturianu significa "parte pela que llenden dos praos, dos países"… y ye ehí, nesa tierra de naide a nivel cinematográficu, nes llendes del cine narrativu y esperimental, onde tán allugaos los filmes que formen parte d'esta seición, la más inclasificable de toles qu'acueye'l Festival Internacional de Cine de Xixón:

Quiero lo eterno (Miguel Ángel Blanca, 2017) El cantante de la banda Manos de topo va presentar mundialmente en Xixón el so primer llargumetraje de ficción, una brillante astraición sobre un grupu d'adolescentes qu'entamen un viaxe p'alcontrase a sí mesmos n'otra realidá.

Those Shocking Shaking Days (Selma Doborac, 2016) Un estudiu en 16mm sobre les carauterístiques propies qu'orixinaron y afalaron la guerra nes repúbliques que formaben Yugoslavia. Estrenu n'España de la ópera prima d'esta direutora d'orixe bosniu, que tuvo la so presentación mundial nel prestixosu certame FIDMarseille.

Nocturno: fantasmas de mar en puerto (Álvaro Fernández-Pulpeiro, 2017) Estrenu européu de la ópera prima d'esti mozu direutor gallegu, del que pudo vese'l so curtiumetraxe Sol mihi siempre lucet, en festivales como Alcances, L'Alternativa o Play-Doc. Una narración enllena de llirismu sobre los marineros avaraos en puertu, que se va presentar mundialmente en Nueva York esta mesma selmana.

Moctezuma-Grau: descendencia mortal (Kikol Grau, 2017) Unu de los cineastes más contestatarios y punk de la escena cinematográfica nacional vuelve a Xixón cola so personal forma d'entender la historia, nesti casu al traviés del últimu descendiente (o non) del llexendariu emperador mexica.

Cocote (Nelson Carlo de los Santos Arias, 2017) Ensin nenguna dulda una de les películes más importantes del cine llatinoamericanu nesti 2017. Presentada en Locarno, onde llogró'l premiu a la meyor película de la prestixosa seición Signs of Life, Cocote ye un viaxe al xerme de la violencia presente nel nucleu de la sociedá dominicana actual.

Perrolobo (Lycisca) (Gerard Ortín, 2017) Un percorríu ablucante xebráu pol valle de Karrantza en Bizkaia, que da una mirada de gran valir antropolóxicu acompañada d'un potente tratamientu visual. Un trabayu qu'amuesa una notable madurez na caligrafía fílmica del mozu realizador.

Xunto a estos llargumetraxes, Llendes tamién va presentar una esbilla d'obres de menor duración pero idénticu interés, que van completar la esbilla. Referímonos a títulos como Fogos, de Martin Pawley y Marcos Pérez, el mesmu dúu que robló la notable Ilusiones Virtuales, o Fajr, de Lois Patiño, ensin dulda unu de los autores más reconocíos del novo cinema galego. Tamién en formato de curtiumetraxe va estrenase n'España lo nuevo del reputáu cineasta portugués João Pedro Rodrigues: Où en êtes-vous, João Pedro Rodrigues?, una mena de continuación del so perpremiáu llargumetraxe O Ornitólogo. Col documental de Virginia García del Pino Improvisaciones de una ardilla, una mirada crítica sobre la política nacional a partir de dos imáxenes aparentemente aleatories, rematamos cola esposición de la nuestra seición más inquieta y estimulante.



ESBILLA
EL 55FICX recupera la tradicional denomación n'asturianu pal espaciu dedicáu a recoyer lo más destacao que se vieron, n'opinión de los nuestros programadores, nel circuitu internacional de festivales cinematográficos. Xunto a esta seleición, Esbilla tamién va ufrir a los espectadores un conxuntu d'estrenos nacionales y internacionales que, por distintos motivos, cuidamos que tienen especial interés. Un bon exemplu d'esto último son los yá anunciaos documentales venceyaos con Asturies: el dedicáu al club y l'afición del U.C. Ceares (El equipo de mi barrio, Rafa de los Arcos, 2017) y el que se refier a la emigración de la nuestra xente na ciudá estauxunidense de Tampa (La plomada, 2017).

Completando'l cupu d'estrenos n'Esbilla, amiéstase a la seleición la premiere mundial de Casa de nadie, dirixida pola profesora, productora cultural y cineasta Ingrid Guardiola. Nella, Guardiola reflexona sobre la vieyera, basándose en dos comunidaes onde se ta produciendo un gran avieyamientu de la población: la colonia minera de Ciñera en Lleón y Sant Andreu Palomar en Barcelona.

No que fai a la seleición propia d'otros festivales, n'Esbilla confirmáronse hasta'l momento los siguientes llargumetraxes:

Western (Valeska Grisebach, 2017) La direutora de Sehnsucht vuelve a trayer el so cine a Xixón, onde yá consiguió'l Premiu a la Meyor película en 2006 gracies a esi filme. Nesta ocasión, Grisebach presenta un rellatu enllenu de tensión nel que muestra les desigualdaes entá presentes na Xunión Europea, usando como escusa la historia d'una cuadriella d'albañiles alemanes encargaos de facer una obra en Bulgaria.

How to Talk to Girls at Parties
(John Cameron Mitchell, 2017) El direutor d'Estaos Xuníos, al que recordarán los espectadores más fieles del FICX gracies a la inolvidable Hedwig and the Angry Inch, que recibió en 2001 el premiu al Meyor Actor, adauta al gran Neil Gaiman nesti viaxe al Londres del punk y les cazadores de cueru, nel qu'entren hasta alieníxenes apuntándose a la fiesta. Cine llibre y gamberro cola interpretación destacada de Nicole Kidman y Elle Fanning.

A fábrica de nada (Pedro Pinho, 2017) Ensin dulda una de les propuestes más atrevíes del añu ye esti mecíu bayurosu de comedia musical y drama social, nel que los trabayadores d'una factoría lusa se rebelen escontra'l sabotax fechu polos propios responsables de la mesma. Un trabayu de gran valentía que llogró'l premiu FIPRESCI de la Quincena de los Realizadores nel pasáu Festival de Cannes.

ANIMAFICX
Anque ye una de les seiciones más moces de les que formen parte del Festival, AnimaFICX, el rincón del nuestru certame dedicáu al maraviyosu mundu de l'animación, convirtióse nuna de les favorites del públicu xixonés. Una bona muestra d'ello ye la gran asistencia d'espectadores que recibió nestos años, convirtiéndose asina nún de los espacios dedicaos a esta forma de facer cine más importantes del nuestru país. Nesti 2017, AnimaFICX presenta una esbilla d'obres internacionales fecha con procuru, y cinco d'elles van proyeutase per primer vez n'España nel FICX.
Hai dellos títulos que comparten programación con otra de las seiciones clave del nuestru festival, Enfants Terribles, como ye'l casu del colorista cuentu infantil Rabbit School: Guardians of the Golden Egg (Ute von Münchow-Pohl, 2017), la esperada superproducción animada Zombillenium (Arthur de Pins & Alexis Ducord, 2017), la poderosa adautación de Roald Dahl Revolting Rhymes (Jan Lachauer, Jakob Schuh & Bin-Han To, 2016), o la deliciosa Ivan Tsarevitch et la princesse changeante, del llexendariu animador francés Michel Ocelot (autor de la saga Kirikú), quien elixó Xixón pa la premiere española del so llargumetraxe nuevu.
Amás d'estes obres, van formar parte de la esbilla los siguientes llargumetraxes:
Loving Vincent (Dorota Kobiela & Hugh Welchman, 2017) El filme que llogró'l Premiu del Públicu del últimu Festival d'Annecy ye una esploración sobre la vida y la muerte de Vincent van Gogh y, al tiempu, una celebración del so arte. Un llargumetraxe pintáu al oleu qu'homenaxa l'estilu del home tres los soleyeros paisaxes d'Arlés, del pintalarrama llocu.
Have a Nice Day (Liu Yian, 2017) Un retratu burllón y violentu sobre la sociedá china d'anguaño. Una fotografía rotoscópica sobre l'ansiedá por consiguir riqueces y poder. Presentada na Seición Oficial del Festival de Berlín, el so humor negro y la so retranca llevaron al so direutor a problemes coles autoridaes del so país, qu'obligaron a retirar el filme de la so presencia tan esperada n'Annecy.
Tehran Taboo (Ali Soozandeh, 2017) Una de les mayores sorpreses de l'animación d'esti añu a nivel internacional, estrenada na Selmana de la Crítica de Cannes. De nuevo la téunica rotoscópica como elementu narrativu gracies al que conocer los secretos más escondíos de la nueche na capital del réxime iranín.
Lu Over the Wall (Masaaki Yuasa, 2017) La vuelta al llargumetraxe (trece años depués de la xenial Mind Game) supunxo, pal direutor xapónés, consiguir el Cristal a la Meyor Película nel festival d'animación más importante del mundu (el d'Annecy) gracies a esta fábula ecolóxica onde un neñu y una serena han xuntase pa salvar una ciudá en peligro.

Como complementu a estos llargumetraxes, AnimaFICX tamién va presentar curtiumetraxes de dalgunos de los autores favoritos del públicu del festival. Nomes como Bill Plympton, que mos va traer Cop Dog (el sestu de los sos trabayos de la serie Guard Dog), David O'Reilly y, de nuevo, la so inimitable entrada nel mundu de los videoxuegos llamada Everything, o Don Hertzfeldt, que cola proyeición de World of Tomorrow, va prologar unu de los estrenos sorpresa del 55FICX, que vamos presentavos más p'alantre, súmense asina a l'atractiva y heteroxénea ufierta d'AnimaFICX.
Palabras clave Festival de Cine, 2017