Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

ENFANTS TERRIBLES VA ESTRENAR N’ESPAÑA UNA CUIDADA Y ESTIMULANTE SELEICIÓN DE PELÍCULES NEL SO VENTI ANIVERSARIU

Votos

(Total de votos recibidos 7)

(Puntuación 3,00)

Seis directores y una actriz van participar nos alcuentros programaos col públicu de la seición más moza del FICX

El programa didácticu del Festival reunió a lo llargo de la so historia a más de 185.000 alumnes y alumnos d’Asturies, Galicia, León y Cantabria
La venti edición d’Enfants Terribles va ufrir al públicu más mozu del FICX trece producciones internacionales, una d’elles fuera de competición, alloñaes del dominiu hollywoodiense pa esfrutar nes sales y reflexonar y debatir nel aula. Trece títulos del cine más nuevu que ta faciéndose en Francia, Irlanda, Alemaña o Canadá, y que van vese equí per primer vegada n’España. Una muestra de películes fecha con procuru a la medida de neñes y neños y adolescentes, auténticos protagonistes d’esta seición, herencia directa del espíritu orixinal del Festival Internacional de Cine de Xixón y una de les sos señes d’identidá.

El programa más mozu del Festival ye un imprescindible pa la comunidá educativa d’Asturies y de comunidaes que llenden con nós, dende va casi dos décades, como lo amuesen los más de 185.000 estudiantes que pasaren peles sales d’Enfants Terribles nes sos diecinueve ediciones anteriores.
Pela competición d’Enfants Terribles van pasar títulos que foren presentaos, y en dalgunos casos premiaos, en festivales como Cannes, Berlín, Toronto, Locarno, Karlovy Vary, Londres, Annecy o Giffoni. Maestros de l’animación como el veteranu Michel Ocelot, ganador d’Enfants Terribles en 1999 con Kirikú y la bruja; Arthur de Pins o los nominaos al Oscar Jan Lachauer y Jakob Schuh, van tar na competición al llau de les primeres obres de Chad Chenouga, Darren Thornton o Nila Núñez. Ún de los conteníos más destacaos de la seición va ser l’estrenu européu de 100 días de soledad, del asturianu José Díaz. Toes estes películes llogren emocionar y muestren otros mundos, otros personaxes mozos a los qu’acompañar y de los que deprender, consiguiendo entretener ensin dar la espalda a asuntos sociales d’especial importancia.

Por primer vegada, los participantes n’Enfants Terribles non solo van escoyer la película ganadora, tamién van programar y van presentar una de les películes. Nesta edición, De toutes mes forces ye la película seleicionada poles cuatro rapaces asturianes qu’acudieron el pasáu mes de xunetu al Festival Internacional de Giffoni, ún de los más importantes del mundu pa públicu infantil y xuvenil, gracies al alcuerdu establecíu ente’l FICX y el certame italianu. Elles recomendaron esta película pa la so programación en Xixón dempués de vela en Giffoni (onde resultó premiada) y a elles se-yos va encomendar la xera de presentala, por primer vegada nel nuestru país.

El cartel
El cartel de la venti edición d’Enfants Terribles foi creáu por César Sánchez, autor de los cartelos de la 54 edición. Sobre esta obra, l’ilustrador asturianu comenta: “Queríemos transmitir la idea d’un espectador mozu inconformista y tresgresor. El mesmu títulu de la seición denótalo y decidimos da-y al logo del FICX una figuración, tresformándolu na cabeza d’un osín de xuguete perversu y, al tiempu, da-y tola fuercia del color, una paleta aditiva de color lluz -el cine a fin de cuentes ye lluz-, amestando a la forma del osín la gama colores RGB, que nos transmite tola enerxía y puxu del ciclu, enfatizándolu al usalu sobre un fondu totalmente blancu, que amás, ye’l resultáu de mecer esos colores”.

La competición
100 días de soledad (España), de José Díaz. Primer película asturiana nel concursu d’Enfants Terribles, constitúi un emocionante cantu a la naturaleza y a la vida alloñada de la modernidá teunolóxica, enllenu d’imáxenes d’espectacular belleza. Presentada recién nel Festival de Jackson Hole (Estaos Xuníos).

Lo que dirán (España), de Nila Núñez. Una de les representantes españoles n’Enfants y que tamién va tar na Competición Internacional Rellumes. La ópera prima de la directora española avéranos a la xera diaria de dos adolescentes marroquís que viven en Barcelona, una auténtica bofetada escontra los nuestros prexuicios.

A Date for Mad Mary (Irlanda), de Darren Thornton. La ópera prima del director irlandés ye una comedia con tastu saláu sobre la transición a la edá adulta. Basada na obra teatral 10 Dates for Mad Mary, de Yasmine Akram, llevó varios premios de la crítica de Dublín y de los gallardones de la televisión d’Irlanda.

Ivan Tsarévitch et la Princesse Changeante (Francia), de Michel Ocelot. Una suerte de milenta sombres d’inspiración rusa y oriental, continuación de los trabayos Príncipes y princesas (2000) y Cuentos de la noche (2011). Con tolos personaxes en sombres chines, la nueva película de Ocelot integra cuatro cuentos tradicionales.

Rabbit School (Alemaña), d’Ute von Münchow-Pohl. L’animadora de Fievel va al Oeste (1991) lleva a la gran pantalla un popular cuentu infantil d’Albert Sixtus de 1924, que narra les peripecies d’un coneyín de ciudá na Escuela de los Coneyos.

Revolting Rhymes (Gran Bretaña), de Jakob Schuh y Jan Lachauer. Los directores, dambos nominaos al Oscar por entrambos cortos d’animación, dan-yos una vueltina a los cuentos que toes y toos conocemos de la mano del gran Roald Dahl. Fuera de competición.

Zombillénium (Francia/Bélxica), de Arthur de Pins y Alexis Ducord. Ye una de les superproducciones d’animación más esperaes de la temporada, basada nel cómic creáu pol propiu De Pins y que foi presentada en Cannes. La película va treslladar a la mocedá a un misteriosu parque temáticu nel que namás trabayen auténticos monstruos vivientes.

Mountain Miracle – An Unexpected Friendship (Alemaña), de Tobias Wiemann. Ganadora de premios en Berlín y Toronto, sigue los pasos d’una adolescente d’asfaltu pelos montes del Tirol. Como curiosidá, una de les guionistes ye Natja Brunckhorst, que nos 80 protagonizó Yo, Cristina F., la película más rentable de la historia del cine alemán.

Weirdos (Canadá), de Bruce McDonald. Road movie en blanco y negro al traviés de Canadá nos años 70, con dos rapazos buscando un cambiu y un incorpóreu Andy Warhol exerciendo de “animal espiritual”. Con guion del veteranu dramaturgu Daniel Maclvor (In on It), foi presentada na última edición de Berlín.

Sur quel pied danser (Francia), de Paul Calori y Kostia Testut. Comedia musical tan reivindicativa como colorista, protagonizada pola magnética Pauline Etienne (La religiosa, Edén).
Porcupine Lake (Canadá), d’Ingrid Veninger. Película que cuenta una prestosa historia d’amistá y amor braniegos, d’esos que camuden el cursu de la to vida. Presentada nel últimu festival de Toronto.

De toutes mes forces (Francia), de Chad Chenouga. Tanto la película como la obra de teatru del mesmu nome cuenten un momentu na vida del direutor. Esta película foi premiada en Giffoni y foi programada poles xuraos xixoneses qu’acudieron al certame italianu.

El libro de Lila (Colombia/Uruguay), de Marcela Rincón. Ópera prima de la directora caleña qu’amuesa a un personaxe fuera del so llibru que necesita l’ayuda del neñu que lu lleía. Un cantu al amor polos llibros y el valor de l’amistá.

Alcuentros col direutor
El Teatru de la Llaboral, el Teatru Jovellanos y el Centru Municipal Integráu Xixón Sur van acoyer los Alcuentros con direutores de les películes d’Enfants Terribles, unes cites imprescindibles coles y colos espectadores más mozos del festival, nes que non solo s’intercambien entrugues sobre cine, sinón tamién sobre los temes centrales de les obres. Trátase de fomentar un intercambiu d’impresiones que promueva’l sentíu críticu de les y los espectadores más mozos. Hasta’l momentu, yá se confirmaren alcuentros colos realizadores que siguen: José Díaz (100 días de soledad), Nila Núñez (Lo que dirán), Ute von Münchow-Pohl (Rabbit School), Jakob Schuh (Revolting Rhymes), Chad Chenouga (De toutes mes forces) y Kostia Testut (Sur quel pied danser), a los que va xunise l’actriz Seána Kerslake (A date for Mad Mary).

La guía didáctica
El FICX pon un añu más a disposición de los centros participantes una serie de guíes didáctiques con más información sobre les películes d’Enfants Terribles, preguntes clave para trabayar en clas, amás de propuestes d’actividaes complementaries. Estes guíes van tar disponibles en formatu dixital na web del festival y tamién van unviase a los colexos ya institutos per corréu electrónicu.
L’oxetivu d’esti preséu ye que les y los participantes n’Enfants Terribles deprendan a lleer el cine, a familiarizase con una pequeña aprosimación al llinguax audiovisual, amás de promover el séptimu arte como ferramienta pedagóxica.

Oficios del cine
Esti añu, otra vuelta, les alumnes y alumnos van tener la oportunidá de descubrir dellos de los perfiles profesionales qu’inclúi una producción cinematográfica gracies a la iniciativa y collaboración del Departamentu de Mocedá de la FMCEyUP y el Conseyu de la Mocedá de Xixón.

Talleres
El FICX entama una nueva collaboración col Festival Internacional de Cine de Clermont-Ferrand nes sos actividaes d’alfabetización audiovisual. Van desarrollase dos talleres: Mesa de lluz virtual y Diseñu de Soníu.

Mesa de lluz virtual
ye un taller qu’ufre a los alumnos y alumnes la posibilidá de trabayar con una aplicación dixital que simula les característiques d’una mesa de lluz, ye dicir, tresforma la pantalla nun llenzu en blanco onde les y los participantes pueden emplegar pinceles pa dibuxar una escena d’una película d’animación.

Nel Taller de diseñu de soníu, los participantes van tener accesu a curtiumetraxes realizaos nos oríxenes del cine y a biblioteques de soníos. Per aciu del usu d’una aplicación, les y los estudiantes van poder crear la banda sonora de los curtiumetraxes seleccionaos.
Col sofitu del Conseyu de la Mocedá del Principáu d’Asturies y del Conseyu de la Mocedá de Xixón, el FICX va poner a disposición de los alumnos y alumnes diez equipos informáticos, facilitaos por Mar de Niebla. Los derechos d’usu de les aplicaciones, propiedá de Clermont-Ferrand, cédense de baldre.

EN-CAXA-OS. Esti taller naz como una propuesta orixinal de les alumnes y alumnos de 2º d’ESO del xixonés Colexu La Corolla a partir del visionáu d’una versión de trabayu del curtiu d’animación Si no soy no puedo ser, de Mario Torrecillas. Esta película ye frutu d’un taller impartíu en Grecia pol direutor nel que participaron 24 neñes y neños sirios y kurdos, y rellata al traviés de les sos voces, l’horror de la guerra y les esperiencies vivíes demientres la dómina de confinamientu nun campu de refuxaos. Esti taller va ponelu’l propiu Torrecillas.

La seición Enfants Terribles del Festival Internacional de Cine de Xixón (17-25 payares) ta entamada pol Conceyu de Xixón, al traviés de Divertia Gijón S.A., y coproducida por Laboral Ciudad de la Cultura. Sofiten l’Institutu de la Cinematografía y de les Artes Audiovisuales del Ministeriu de Cultura, el Gobiernu del Principáu d’Asturies y El Comercio. Collaboren Liberbank, Festival International du Court Métrage à Clermont-Ferrand, Conseyu de la Mocedá del Principáu d’Asturies, Conseyu de la Mocedá de Xixón, Conseyería d'Educación y Cultura, Conceyalía de Mocedá, Abierto hasta el Amanecer, Conceyalía de Servicios Sociales, Fundación Mar de Niebla y Conceyalía d’Educación y Cultura

.
Palabras clave Festival de Cine, 2017