Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

EL CINE FECHU N’ASTURIES APUERTA A LES COMPETICIONES INTERNACIONALES DEL 55FICX

Votos

(Total de votos recibidos 1)

(Puntuación 0)

elisaok
José Díaz va tar con “100 días de soledad” nun pase especial y tamién van competir n’Enfants Terribles, y a Esbilla acuden Luis Argeo y James D. Fernández con “La plomada” y Rafa de los Arcos con “El equipo de mi barrio”.

Ramón Lluís Bande va facer doblete nel certame xixonés col llargumetraje “Escoréu, 24 d’avientu de 1937” en Rellumes, y “Aún me quedan balas para dibujar” na Sección Oficial de Curtiumetraxes

El Festival de Xixón va dedicar un focu a la cineasta asturiana Elisa Cepedal

Cuando queden dalgunes selmanes pa cerrar la programación, la 55 edición del Festival Internacional de Cine de Xixón yá tien confirmada la presencia de delles películes de producción asturiana nes sos competiciones internacionales. Por primer vegada, van coincidir nes seiciones Enfants Terribles, Esbilla y Rellumes llargumetraxes de producción local. El proyectu del fotógrafu y naturalista José Díaz, “100 días de soledad”, va ser una de les Proyeiciones Especiales del Festival, amás de competir n’Enfants Terribles. Ramón Lluís Bande va presentar el so llargumetraxe caberu en Rellumes. N’Esbilla Luis Argeo y James D. Fernández van presentar “La plomada”, y Rafa de los Arcos va llevar la historia del U.C. Ceares. D’otra miente, la participación asturiana va trescender el concursu pa llegar a les retrospectives: el 55FICX va dedicar un ciclu al cine a ras de la realidá d’Elisa Cepedal, lo que constitúi el primer focu dedicáu a un cineasta asturianu na historia recién del certame.

A les proyeiciones especiales del 55FICX apuerta l’últimu proyectu del naturalista asturianu José Díaz (Uviéu) co-dirixíu con Gerardo Olivares (Córdoba, 1964), “100 días de soledad”. La película, que tamién va competir n’Enfants Terribles, amuesa’l retiru de Díaz nuna cabaña del Parque de Redes, siguiendo la filosofía de llexendarios eremites de los sieglos XIX y XX como H.D. Thoreau, Richard Proenneke o Sylvain Tesson. Partiendo de los sos proyeutos dedicaos a la montaña asturiana, Díaz vive en soledá total los cambios que van aportando, adulces, na Reserva de la Biosfera del Altu Nalón demientres 14 selmanes. Esa fusión col santuariu natural de Redes val-y non solo como averamientu estéticu a la naturaleza, sinón pa cuestionar el nuestru progresu frenéticu como especie.

Ramón Lluís Bande (Xixón, 1972) va facerdoblete na competición del 55FICX: el so llargumetraxe caberu, “Escoréu, 24 d’avientu de 1937”, va tar na Competición Internacional Rellumes, y “Aún me quedan balas para dibujar”, na Sección Oficial de Curtiumetraxes (yá anunciada). Fiel a la so austeridá y a esi cine non reconciliáu política nin industrialmente, Bande presenta un llargumetraxe nel que conecta al presente cola Nuechebona de 1937, cuando dos hermanos foren sacaos de la so casa d’Escoréu (Pravia) por un falanxista, siendo asesinaos de siguío. Ochenta años dempués, un grupu de voluntarios busca los sos restos, fechu que Bande aprovecha pa rodar otru exemplu de cine resistente y, de pasu, contar histories qu’entá tán ensin cuntar. Xixón va ofrecer les premières mundiales de dambes películes.

La producción astur-americana “La Plomada”, dirixida polos cineastes Luis Argeo (PiedrasBlancas, 1975) y James D. Fernández (Nueva York, 1961) va formar parte de la programación de la Seición Internacional Esbilla. La nueva collaboración ente dambos directores venceýase al so documental anterior, “Un legado de humo” (2014), onde yá xunieren el pasáu y el presente de la colonia española que va 100 años trabayó nes fábriques de cigarros de Tampa (Estaos Xuníos).

Cofinanciada gracies a les aportaciones de más de 300 mecenes al traviés d’una campaña de crowdfunding, “El equipo de mi barrio” presenta la cotidianeidá, el correr de los díes del emblemáticu club xixonés U.C. Ceares. Un equipu de fútbol a piques de desapaecer que foi rescatáu del desaniciu gracies a la voluntá de los sos aficionaos, héroes anónimos que recuperaren pal barriu l’auténticu sabor del fútbol orixinal, alloñáu de mercantilismos ya idolatría, calteniendo la esencia d’un deporte entendíu nel más puru de los sos significaos. Xixón va acoyer l’estrenu d’esti documental, ópera prima del cineasta Rafa de los Arcos, na Seición Internacional Esbilla.


Elisa Cepedal


El 55FICX avérase al cine de la realizadora asturiana Elisa Cepedal (Barredos, 1982) al traviés d’un focu que va amosar al públicu la so particular forma de mirar la realidá y cómo la tresforma nun cine cenciellu pero mui eficaz.

El trabayu de Cepedal ye conocíu del públicu de Xixón porque foi la ganadora del premiu Nuevos Realizadores en 2010 y presentó los sos trabayos na Seición Oficial de Curtiumetraxes y en “La Noche del Corto Español”.

Cepedal, somorguiada agora na preproducción del so primer llargumetraxe, torna al FICX con un programa qu’inclúi “La Playa” (2010) y “Ay Pena” (2011), curtios qu’amás yá se mostraren en centros d’arte y festivales como’l MoMA o BAFICI. El tríu complétase con “El desastre” (2014), aportación a la película colectiva “Llar” (2014), estrenada nel Festival de Mar del Plata.

La mirada realista de la realizadora asturiana Elisa Cepedal súmase al arte multimedia y conceptual de l’austriaca VALIE EXPORT y al cine intimista y delicáu de Carla Simón, nos tres focos dedicaos a realizadores qu’el FICX anunció hasta’l momentu.


Día d’Asturies y Nuevos Realizadores


La convocatoria pa presentar películes al Día d’Asturies, seición patrocinada pola Radiotelevisión del Principáu d’Asturies (RTPA), remata’l prósimu 6 d’ochobre. L’oxetivu d’esta seición ye potenciar la carrera de nuevos y nueves directores y productores asturianos apostando pol futuru de la creación cinematográfica y audiovisual n’Asturies. Xixón, en collaboración con Laboral Cineteca, va conceder el premiu ‘Laboral Cineteca Cortos’, que va incluise nel Día d´Asturies y que va otorgase a ún de los curtiumetraxes que formen parte de la seleición. Esti gallardón consiste na distribución del curtiu seleccionáu nos festivales y certámenes cinematográficos más destacaos, tanto de la escena nacional como internacional. Convocatoria del Día d’Asturies, equí.

Per otru llau, la convocatoria del Premiu Nuevos Realizadores del Principáu d’Asturies sigue abierta hasta’l 20 de setiembre. El proyectu ganador va algamar un premiu de 5.000 €. El curtiumetraxe realizáu va estrenase na 56 edición del Festival. Bases del Premiu Nuevos Realizadores, equí.
Palabras clave Festival de Cine, 2017