Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Carla Simón va protagonizar un focu del certame xixonés, el primeru dedicáu a la direutora de Verano 1993, una de les películes del añu

Votos

(Total de votos recibidos 0)

(Puntuación 0)

Carlasimon
El 55FICX aborda’l cine intimista y delicáu de la direutora Carla Simón con un doble programa nel que vamos poder ver la so ópera prima, Verano 1993, una de les tres finalistes pa representar a España nos Oscar, al empar qu’una cuidada esbilla de los sos trabayos en curtiu.

Esti focu, que va dar la oportunidá al públicu de descubrir la evolución del personal estilu de la realizadora, parte de los sos exercicios de direición na London Film School y na University of California, dalgunos d’ellos nunca presentaos nel contestu d’un festival de cine, como Home (2012) y Stranger (2011). El programa de curtios tamién inclúi títulos como Lipstick (2013) y Las pequeñas cosas (2015) – la so película de graduación de la LFS -, al igual que Llacunes (2016), trabayos que tuvieron un mayor percorríu y que fueron los pasos previos pa la formación d’un estilu distintivu que Carla Simón plasma nel so primer llargumetraxe Verano 1993.

Gracies a Verano 1993, Simón consiguió numberosos premios en dellos festivales internacionales como Berlín (Meyor Ópera Prima, Meyor Película Generation Kplus), BAFICI (Meyor Direición), Málaga (Biznaga de Oro), Estambul y Odessa. D’igual miente, el llargumetraxe ye una de les producciones españoles prenominaes a los premios de l’Academia del Cine Européu (EFA).

El focu dedicáu a Carla Simón englóbase dientro de los ciclos y homenaxes que’l 55FICX va dedicar a direutores de distintes xeneraciones, y forma parte de la collaboración ente’l Festival y l’asociación Mujeres de Cine.