Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

LLUÍS HOMAR, PREMIU NACHO MARTÍNEZ 
DÍAS DE CINE, PREMIU D'HONOR DEL FICX

Votos

(Total de votos recibidos 26)

(Puntuación 2,85)

lluis homar
La directora española Judith Colell presiderá el Xuráu Internacional, formáu tamién pol productor David Matamoros, el directores Nima Javidi y Claudia Pintu, y la programadora Kathleen Haney
L'actor Lluís Homar (Barcelona, 1957) va ser reconocíu na 54 edición del Festival Internacional de Cine de Xixón col Premiu de Cinematografía Nacho Martínez 2016. Esti galardón naz en 2002 como homenaxe al desaparecíu actor pa reconocer los valores humanos y la trayectoria vital de los profesionales del cine. El protagonista de películes como Eva, Los abrazos rotos o La plaza del Diamante va allegar a Xixón pa recoyer el premiu'l próximu 20 de payares, nun actu que va tener llugar nel Teatru Xovellanos.

Falar de la carrera d’Homar ye percorrer les últimes cuatro décades del cine, la televisión y el teatru nel nuestru país al traviés de personaxes que comen les pantalles y enllenen los escenarios. Dende'l so debú, en 1982, a les ordes de Francesc Betriu, nesa costumbrista hestoria de posguerra que ye La plaza del diamante, hasta La fosa (Pere Vilà i Barceló), la so voz envolvió decenes d'hestories nel cine, tresformándoles n'hestories inolvidables al traviés de personaxes imprescindibles. Esto ye lo que Lluís Homar consigue en cada interpretación: insuflar credibilidá a cada tipu al que da vida. Quiciás sía porque, según diz, gústa-y implicase personalmente, dir más allá de lo profesional por que los resultaos sían meyores.

Na gran pantalla, Homar desempeñó munchos papeles, como Max, el robot mayordomu na película de ciencia ficción Eva (2011), de Kike Maíllo, papel que-y val el so primer Goya. Otros roles destacaos son la so participación en La mala educación (2004) y Los abrazos rotos (2009), de Pedro Almodóvar, la so interpretación del Papa Alejandro VI en Los Borgia, d'Antonio Hernández, o Gonzalo, el celebru de Los Pelayos, d’Eduard Cortés.

Tamién trabayó con dalgunos de los directores más destacaos del panorama español en más de cuarenta títulos: Mario Camus (La ciudad de los prodigios), Vicente Aranda (Si te dicen que caí), Pilar Miró (El pájaro de la ciudad), Gerardo Vera (La Celestina), Ventura Pons (Morir o no) o Montxo Armendáriz (Obaba), Manuel Gómez Pereira (Reinas) y Julio Medem (Caótica Ana).

El Premiu de cinematografía Nacho Martínez consiste nuna escultura única fecha por Jaime Herrero, concedida de manera altruista a esti certame.

Premiu d'Honor

El Festival Internacional de Cine de Xixón otorga'l Premiu d'Honor de la 54 edición a Días de Cine, míticu programa de TVE que cumple 25 años en 2016.

Un 6 d'ochobre de 1991, domingu, empezaba la emisión de Días de cine. Dirixíu por César Abeytua, duraba media hora, nun tenía presentador, yera en 4:3, y presumía de la meyor postproducción que la dómina dexaba. Ehí empezó una de les grandes declaraciones d'amor al cine que se fixeron (y fáense) nel nuestru país.

Col tiempu llegó l'actriz Aitana Sánchez Xixón, y depués Antonio Gasset, qu’amás dirixía'l programa. Gasset foi la cara del espaciu mientres trece años. Los sos comentarios yá circulaben per internet cuando les redes sociales nun taben nin suañaes. Días de cine convirtióse, ensin priesa pero ensin pausa, nun programa de cultu, frutu del carisma y acidez del so director, pero tamién pola calidá del trabayu que surdía dende una redacción siempre entregada al cine.

Aquella media hora convirtióse nuna hora. Los díes cambiaron, del domingu inicial, Días de cine foi pasando pel sábadu, el vienres, inclusive los miércoles, hasta llegar a asitiase definitivamente los xueves. Foi siempre seña d'identidá de Días de cine cuntar les coses con espíritu llibre y críticu. El FICX nun escapó a les redes que l'equipu d'esti míticu programa echaba nos festivales más prestixosos y/o suxerentes del mundu. Les nuestres propuestes nes dos últimes décades tuvieron tamién na redacción de Días de Cine, y d’ehí trespasaron la pantalla pa llegar a la gran comunidá de cinéfilos que siguen el programa de TVE cada selmana.

Xuraos
La directora española Judith Colell va presidir el Xuráu Internacional de la 54. Colell, que robló películes como Nosotras, 53 Días de invierno o Elisa K y qu'anguaño ye vocal de l'Academia de l'Artes y les Ciencies Cinematográfiques d'España, va encabezar un xuráu formáu por cinco espertos ente los que s'atopa David Matamoros, productor con un historial de premios y reconocencia internacional tantu n'Europa como n'Estaos Uníos. Los sos creitos inclúin, ente otros, Menu degustación (Roger Gual), Vulcania (José Skaf) y El año de la plaga (C. Martín La Ferrera). Anguaño atópase en preproducción de The House That Jack Build, de Lars Von Trier.

Al pie de ellos van tar Nima Javidi, director iranín que consiguió tres premios na 52 edición del FICX cola so ópera prima, Melbourne (Meyor Director, Meyor Guión y Premiu Xuráu Xoven); la programadora Kathleen Haney, del WorldFest Houston, y la guionista y directora Claudia Pinto, que participó na competición de Xixón cola so ópera prima, La distancia más larga (2013), que recibió 17 premios internacionales.

El xuráu internacional va encargase de repartir los premios de la Sección Oficial a concursu, qu'anguaño cunta colos últimos trabayos de Marcu Bellocchio, Andrei Konchalovsky, Brillante Mendoza, Manane Rodríguez o Danis Tanovic.

El xuráu de los curtiumetraxes a competición ta formáu pol director Nacho Vigalondo (director del curtiu 7:35 de la mañana, premiáu nel FICX, y de llargos como Los cronocrímenes, Extraterrestre y Open Windows) y les actrices Elena Furiase (El internado, Luz de Soledad y Poveda) y Úrsula Corberó (Isabel, Perdiendo el Norte, ¿Quién mató a Bambi?).

Nel xuráu d’AnimaFICX van tar la directora Anca Damian, ganadora d'esta sección l'añu pasáu por La montagne magique; Fumio Obata, polifacéticu creador gráficu, autor de dellos vídeos para Duran Duran. Esti grupu completase con Isabel Herguera, directora, productora y profesora d'Animación na KHM Kunsthochschule für Medien en Colonia.

Per segundu añu consecutivu va facese entrega del Premiu CIMA a la meyor directora de toles secciones competitives. El xuráu que va otorgar esti galardón ta formáu pola productora italiana Francesca Delise, productora de Los Feliz, trabayó en festivales como'l de Triestre y el MedFilm de Roma; Marian Matachana, Fundadora de la Talent Agency y socia de la productora KaBoGa Art &Films, y l'actriz y directora María Reyes, que col so primer trabayu, el curtiu Una Caja de Botones, ganó'l Goya al Meyor Curtiumetraxe.

El xuráu FIPRESCI ta compuestu por trés escritores y críticos de la Federación Internacional de Críticos de Cine: Jean-Max Méjean (CinéLibres de Le Nouvel Observateur, Jeune Cinema, autor de llibros como Almodovar, -les femmes et les chansons y Giuletta Masina, la muse de Fellini), Abbas Bozkurt (Time Out Istambul, Altyazi, Sabit Fikir) y Pablo García Conde (Mundo Hispánico, Transit: cine y otros desvíos)
Palabras clave Festival de Cine, 2016