Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.


Llendes y Rellumes descubren joyas del último cine de autor

Votos

(Total de votos recibidos 21)

(Puntuación 3,00)

llendesyrellumes
Llendes acueye la estrena n’España de Menandros & Thaïs, Isola, Una novia de Shanghai y Disco Limbo
• Rellumes amuesa nueve chispes cinematográfiques que vuelven del revés temes como la muerte, la migración, la destrucción de la vida rural n’España, los matrimonios concertaos n’Irán o’l rock afganu
La 54 Edición del Festival Internacional de Cine de Xixón presenta les estayes de Llendes y Rellumes más híbrides de los últimos años, dos programes enllenos d’ayalgues del cine d’autor últimu que van amosar al públicu de Xixón estrenes nacionales como Radio Dreams, de Babak Jalali, o La luz incidente, de Ariel Rotter, y el meyor cine puestu n’otros certámenes internacionales, como Rosa Chumbe, de Jonatan Relayze; Life and A Day, de Saeed Roostaee o Isola, de Fabianny Deschamps.

LLENDES
Llendes sigue’l camín marcáu por ediciones anteriores con un cine atrevíu, minuciosu o reflexivu, qu’asume riesgos formales, y nel que la frontera ente la ficción y la non ficción queda entemecida, con Menandros & Thaïs, Isola, Una novia de Shanghai y Disco Limbo. Les cuatro películes son estrenu n’España.

Una novia de Shanghai, de Mauro Andrizzi (Arxentina/China). La última película del director arxentín inspírase nes clásiques screwball comedies, cola muerte como disculpa. El resultáu ye un filme rápidu, llenu d’absurdos y enriedos sobre’l treslláu del cadabre d’una moza hacia la so morada última siguiendo una tradición del sieglu XVII de casorios ente pantasmes. Andrizzi rodó esti deliriu místicu nuna megaciudá que nun conocía y nun idioma que nun fala y con música de Moreno Veloso y los tantos de la cai de Daniel Melingo.

Menandros & Thaïs, d’Ondrej Cikan y Antonin Silar (República Checa, Austria). Película d’aventures esperimental qu’entemez elementos mitolóxicos con contemporáneos. Ópera prima de Silar y Cikan, autor amás de la novela homónima que cuenta un gran amor de lleenda y un mayor deséu de venganza. Película con ecos del teatru esperimental, na que queda espeyáu l’oficiu d’escenógrafu de Silar y la formación de Cikan como filólogu clásicu. Títulu qu’anda ente les estravagancies de Greenaway y la imprescindible Marketa Lazarova de Frantisek Vlácil.

Isola, de Fabianny Deschamps (Francia, Tunez). Llírica película que se mete nos interiores del drama de la migración n’Europa. Rodada como un documental en Lampedusa y Sicilia nún de los momentos más duros de la crisis migratoria, Isola tamién ye una ficción qu’amuesa a una moza china n’estáu como una islla en mitá del torbolín d’homes y muyeres qu’escapen d’un presente terrible na busca d’un futuru meyor. Mentes cuenta la hestoria de la protagonista, Deschamps nun nos oculta rescates, identificaciones, muertes…

Disco Limbo, de Fredo Landaveri y Mariano Toledo (Arxentina). La ópera prima d’estos dos directores ta pensada como si fuere una canción pop: mozu quier conocer a mozu, mozu conoz a mozu, mozu narómase de mozu. Y too en mitá d’una fiesta. Landaveri y Toledo planteguen un viaxe a la mente del protagonista como una gran videoclip, coqueteando col videoarte y faciendo que parte de los diálogos sían pedazos de canciones de grupos y artistes tan estremaos como Fito Páez, The Killers, Dënver, Ricky Martin o Babasónicos.


RELLUMES
El públicu de la 54, qu’escueye colos sos votos a la película ganadora de Rellumes, va tener énte sí nueve miraes del panorama cinematográficu internacional, que se vuelven el complementu necesariu a la Sección Oficial del propiu FICX. Estos títulos, toos estrenos n’España, dan la vuelta a los temes convencionales y descubren n’ellos una fuerza escepcional. Películes qu’afiten el fuerte puxu de Llatinoamérica como La luz incidente o Rosa Chumbe, y de cinematografíes tan alloñaes como les de República Dominicana, Irán, Canadá o España, de la que se va ver El pastor.

Radio Dreams, de Babak Jalali (Estaos Uníos). El públicu de Xixón pudo ver la ópera prima d’esti director iraní na sección oficial de la 47 (Frontier Blues) y agora’l FICX estrena n’España’l so segundu filme, que yá salió trunfador en Rotterdam, Seattle y nel Tarkovsky Festival. Radio Dreams ye una reflexón sutil sobre la diáspora iraní al traviés d’esta hestoria qu’axunta a Kabul Dreams, la primer banda de rock d’Afganistán, con Metallica. Cola participación de Lars Ulrich defendiendo la música como verdá universal compartida por toos.

La luz incidente, d’Ariel Rotter (Arxentina). El director arxentín llevó un premiu na 47 edición del FICX pol guión d’El otro. Vuelve al festival col so tercer llargumetraxe, premiáu en L’Habana y Mar de Plata, una elegante crónica en blancu y negru sobre una rellación sentimental qu’empieza cuando la muyer vive’l duelu pol so home muertu.

Rosa Chumbe, de Jonatan Relayze (Perú). La ópera prima d’esti director limeñu lleva una buena collecha de premios en festivales internacionales como Buenos Aires, Montreal o Austin. Relayze retrata a Rosa Chumbe, policía que ve interrumpida la so rutina cuando la so fía de 18 marcha de casa dexándola ensin aforros y con un nietu que curiar. Cola participación de Gordo Casaretto, iconu del humor peruanu.

La mécanique de l’ombre, de Thomas Kruithof (Francia, Bélxica). El primer llargumetraxe de Kruithof ye un thriller d’espionaxe paranoicu que cuenta con un elencu que suma premios en Cannes, Venecia o los Cesar, como François Cluzet (Intocable) o Alba Rohrwacher, a la que tamién vamos ver nel FICX n’El cuento de los cuentos, de Garrone.

El pastor, de Jonathan Cenzual Burley (España). El director salmantín estrénase nel certame xixonés col so tercer llargumetraxe, que llogró trés premios nel últimu Festival Raindance de Londres. Rodada na Salamanca profunda, la película amuesa los choques que trai la cobicia nel mundu rural.

Rosalie Blum, de Julien Rappeneau (Francia). El fíu de Jean-Paul Rappeneau estrénase como director con esta comedia basada nel cómic homónimu de Camille Jourdy, una suerte de “cuando Vicent atopó a Rosalie” protagonizáu pola directora Noémie Lvovsky (Camille Redouble).

Jeffrey, de Yanillys Pérez (República Dominicana, Francia). Documental premiáu en Toronto que cuenta la vida d’un pequeñu llmpiador de parabrises de 12 años que vive en Santo Domingo, a orielles del ríu Ozama y que quier llegar a ser cantante de reggaetón. La directora y actriz (Carlos de Assayas) esplicó qu’en Jeffrey “la realidá ye más fuerte que la ficción”.

Pays, de Chloe Robichaud (Canadá). La directora canadiense cruza les vides de trés polítiques nun país insular ficticiu, nunes negociaicones dures sobre minería. Robichaud básase nun casu real p’aparar nes hestories personales que s’escuenden detrás d’un conflictu políticu.

Life and A Day, de Saeed Roostaei (Irán). La ópera prima d’esti director iraní llogró nueve Crystal Simorgh na última edición del Festival de Fajr, el más importante del país persa. La heroína d’esta película quier salir del so entornu contrariu, y va intentalo aceptando una (poco clara) proposición de matrimoniu.