Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

FICXLAB PON LA SO MIRADA NA PERCEPCIÓN DEL UNIVERSU DE LA VANGUARDIA ARTÍSTICA

Votos

(Total de votos recibidos 72)

(Puntuación 3,06)

ficxlab
La cuarta edición de esta sección explora siete focos del cine experimental y el trabajo del cineasta John Price
La interrelación ente’l cine y otres disciplines artístiques vuelve a tener el so espaciu en FICXLAB. Na so cuarta edición, esta sección va esplorar les posibilidaes estétiques y narratives de la imaxe en movimientu al traviés de trabayos de nueve artistes, representantes de les corrientes más vanguardistes del cine esperimental y del vídeu-arte.

FICXLAB va ufiertar una mirada caleidoscópica sobre estes tendencies actuales, amosando obres d’artistes contemporáneos de los que se mostraron trabayos en museos como’l Reina Sofía, el Guggenheim, el Palais de Tokyo de París, el Centru de Cultura Contemporánea de Barcelona, o la Sensory Ethnography Lab de la Universidad d’Harvard, amás de participar en festivales como Berlín, Rotterdam, Toronto, New York o’l FIDMarseille.

Al traviés d’escenarios como una mina, una cordillera, una cueva esculpida per un tiempu profundu o un covarón pintáu polos nuestros antepasaos, la serie de visiones, suaños, memories, especulaciones plástiques y emanaciones de lo oculto que dan forma a esta sección faen hincapié na necesidá de desarrollar una nueva rellación cola naturaleza; asina como otra forma de dar cuenta de la complexidá y la riqueza de los procesos psíquicos de la vida humana.

FICXLAB ta compuestu por sesiones de proyecciones en vídeu agrupaes en 3 conxuntos y un programa de 16 mm. Per un llau, trátase d’una serie de películes d’esti añu últimu que faen referencia a la capacidá de producir imáxenes como un fenómenu onde la imaxinación s’enfrenta a la necesidá d’encarnase en materia.

Otru de los programes ta dedicáu al cineasta John Price, que se val del procesu fotoquímicu pa falanos de cómo percibimos l’universu que nos arrodia y les sos variaciones. El programa de películes de Price fue fechu en collaboración con CINEINFINITO, Filmoteca de Cantabria, y el Grupu de diálogu sobre cine contemporáneu del MUSAC de Llión.

FICXLAB va ofrecer los siguientes focos:

Programa 1

Volva, d’Edouard Decam
2016. Film 16mm transferred to HD / 4:3 /colour / sound / 24´ 39''
Edouard Decam (Libourne, Francia, 1978). Arquitectu pola Escuela Superior d’Arquitectura y Paisaxe de Burdeos, la so práctica artística céntrase na rellación que se texe ente espaciu y tiempu, al traviés del prisma del arte y la ciencia. Volva ye’l nome que l’astrónomu y matemáticu alemán Johannes Kepler dio a la Tierra vista dende l’espaciu nel so llibru Somnium, consideráu como la primer obra de ciencia-ficción. Los observatorios estudien un pasáu mui llonxanu, suspendíos nun tiempu indetermináu ensin malapenes prestar atención al territoriu circundante. Centráu nel observatoriu astronómicu del Pic du Midi de Bigorre, nos Pirineos, esta película grabada en 16mm reflexona sobre la rellación espaciu-temporal que se da ente arquitectura, ciencia y paisaxe.

Las bocas, de Carlos Martín Rodríguez
2016. HD / 16:9/ colour / sound/ 33´
Carlos Martín Rodríguez (Zamora, 1988). Depués de llograr el títulu de Máster n’Investigación n’Arte y Creación de la Universidá Complutense de Madrid, ente 2013 y 2014, trabayó na galería-taller Benveniste Contemporany, onde collaboró como asistente en proyectos d’abondos artistes nacionales y internacionales. El so trabayu xira sobre la construcción d’aparatos de ficción complexos, esperimentales y poéticos alrededor del llinguaxe, el discursu, el testu, la voz y les sos distintes implicaciones rellacionaes cola producción d’imáxenes.
El títulu del film, Las Bocas, débese a un eremitoriu medieval talláu nuna paré de roca caliza, xusto onde acaba ún de los ermos de la meseta castellana. La problemática que presenta un sitiu que tuvo destináu al silenciu llamáu Las Bocas, nel marxe de la planicie, conviértelu nun puntu de partida interesante en rellación coles teoríes post-estructuralistes sobre’l llinguaxe y la construcción del sentíu. L’intentu del film radica na busca d’una fala de lo indeterminao que se despliega como un sistema de resonancies y analoxíes, intentando afirmar la diferencia en sí mesma, ensin la subordinación a la representación o a la identidá.

La part maudite, de David Ferrando Giraut
2016. HD / 16:9 / colour / sound / 35'
David Ferrando Giraut (Negreria, A Coruña, 1978). Master en Belles Artes pola Universidá de Goldsmith de Londres, el so trabayu, centráu principalmente en formatu vídeu, soníu y instalación, atópase nel cruce de dellos filos conceptuales como son la hibridación d’elementos naturales, teconoloxía y organización socio-política.
Hubo, nos oríxenes del arte conceptual puru o analíticu, una voluntá esplícita de renunciar a la dimensión estética de la obra d’arte, cola intención de crear un arte puramente intelectual. Esti intentu fracasó n’última istancia, pero produció un cambiu na ontoloxía de la obra d’arte. La Part Maudite cuestiona esta rocea hacia’l nivel estéticu del arte dende la década de 1960, no que se llamó arte postconceptual, y vincúlalu a la progresiva colonización del ámbitu estéticu per parte del capitalismu. La narración estructúrase sobre les reflexones d’una historiadora del arte, nun futuru cercanu. Esta apara en cinco momentos históricos distantes, analizando diferentes aspectos de la imaxe: el so nacimientu nel Paleolíticu Superior; la Grecia clásica y la profundidá de la superficiu pictórica; la busca de ferramientes de visualización na Illustración; l’ascensu del conceptual nos 60, y el so refugu del aspectu estéticu de la obra d’arte, y el cultu estéticu al individuu anguaño.


Programa 2

ELDORADO XXI
, de Salomé Lamas
2016. HD / color / sound 125’
Salomé Lamas (1987, Lisboa). Depués d’estudiar cine en Lisboa y Praga, Salomé Lamas formóse na Gerrit Rietveld Academie. El so trabayu desarrolla un espaciu ente la ficción y el documental, onde la narración trabaya a partir de la recuperación de memoria cola fin de convocar determinaos traumes históricos faen visible lo invisible.
ELDORADO XXI desarróllase como una forma de rellatu etnográficu filmáu en La Rinconada y Cerro Lunar, a más de 5000 metros d’altura, nos Andes de Perú. Ellí, la ilusión humana atopa cola destrucción, el mieu y la violencia, debaxo’l telón de fondu de la llucha polos recursos y el dominiu de la naturaleza.

Montañas ardientes que vomitan fuego, de Samuel M. Delgado y Helena Girón
2016. HD / 4:3 / colour / sound / 15' DCP
Los trabayos de Samuel M. Delgado (S/C de Tenerife, 1987) y Helena Girón (Compostela, 1988) tuvieron un gran percorríu en festivales internacionales de referencia como Toronto International Film Festival, New York Film Festival, Mar del Plata, FIC Valdivia, Curtas Vila do Conde, Ann Arbor o Media City Film Festival, onde fueron premiaos. Tamién tuvieron premios nel Festival des Cinémas Différents et Expérimentaux de Paris, n’Alcances y nel Curtocircuito International Film Festival onde recibieron el premiu a meyor película y el premiu del públicu. Les sos películes fueron echaes en centros d’arte y museos como’l CCCB (Barcelona) o’l TEA (Tenerife) onde tamién echaron va poco una videuinstalación.
L’interior de la tierra conviértese nel refuxu frente a l’amenaza que se ta averando a la islla. Los tubos volcánicos son vasos comunicantes ente espacios y tiempos. Nellos esperiméntase la resistencia.

Programa 3

Nuestra amiga la luna
, de Velasco Broca
2016. HD. / 4:3 / colour / sound / 15´
Velasco Broca (Amurrio, 1978). Fai’l so primer curtiumetraxe, Footsy en Super-8, alredol de la hestoria d’apareamientu de dos caballos muertos. Esto ábre-y les puertes a otros proyectos más ambiciosos como’l poder facer curtiumetraxes en 16 mm. Asitiáu yá como ún de los curtiumetraxistes más interesantes de la década, encárgase-y un proyectu de videu d’educación sexual qu’al final termina convirtiéndose nel so curtiumetraxe nuevu: Der Milchshorf, n’español La Costra láctea, que tien una gran acoyida y que mantién les constantes del so trabayu: el fetichismu, la España folclórica, y los alieníxenes.
Hadji ye un mozu hindú con llimitaciones físiques que vive humildemente a orielles del Ganges. Depués de perder lo poco que tien, ye aceptáu como discípulu por un guía espiritual d’orixe rusu. Esta alianza va dar llugar a unos estravagantes episodios que van tener la so repercusión, al traviés d’un principiu sincrónicu, n’otros puntos d’occidente. Esta película curtia ta inspirada nel testu gnósticu del sieglu III El himno de la perla.

Sol negro (Black Sun), de Laura Huertas Millán
2016. HD. / 16:9/ colour / sound / 42´
Artista y cineasta franco-colombiana que vive en París, el so trabayu céntrase na descripción del so entornu cercanu, nun sentíu qu’engloba lo colonial y lo personal, ye dicir, lo político y lo afectivo. Dende 2014 participa del Sensory Ethnography Lab de la Universidad d’Harvard. El so trabayu echóse nel Muséu Guggenheim, el Palais de Tokyo de Paris, asina como en festivales como FIDMarseille, Curtas Vila do Conde, Doclisboa, Tampere o L´Alternativa, ente otros.
Antonia ye una cantante llírica con una belleza poco común. Recuperándose d’un intentu de suicidiu nuna institución pa rehabilitación, los sos llazos familiares parecen dafechu rotos. La so hermana ta profundamente afectada polo pasao. Sol negro muévese nun territoriu intermediu, ente la entrevista de ficción, la etnografía y la música: un retratu d’una artista que trata de volver del ifiernu. El so títulu fai referencia a un símbolu de la melancolía descritu por Hipócrates y más espardíu nel Romanticismu.



Programa 4. John Price

Fire #3 - 2:45 (2004)
Remembrance Day Parade - 2:45 (2005)
Crossings - 9:00 (1994-2000)
Sunset - 2:45 (2005)
Wreck / nation - 10:00 (1197)
Beati mundo corde - 8:00 (2002)
Eve - 6:00 (2006)
Naissance - 11:00
The Sounding Lines Are Obsolete - 10:00 (2004)
John Price produció películes esperimentales, danza y diarios filmaos dende 1986. El so amor pola fotografía analóxica llevólu al mundu de l’alquimia y la esperimentación, dende onde desarrolló gran cantidá d’emulsiones fotoquímiques y formatos d’imaxe. Dedicáu a esta tarea de revelar la realidá y por y con otros medios, el so cine presta gran atención a les testures qu’él, a posteriori comunica con una serie de testos y cuadros.
El so trabayu tuvo’l sofitu de The National Film Board, asina como de la Canada Council for the Arts. Esti programa abarca munches pieces de la so producción en 16 mm y quier crear una imaxe de conxuntu del so llabor como cineasta de la percepción.

La sección FICXLAB del Festival Internacional de Cine de Xixón (19-26 noviembre) ta organizada pol Ayuntamientu de Xixón, al traviés de Divertia Gijón S.A. Patrocinen el Ministeriu de Cultura, la Conseyería d'Educación y Cultura del Gobiernu del Principáu d'Asturies. Collaboren Cineinfinito, Filmoteca de Cantabria y el Grupu de diálogu sobre cine contemporáneu del MUSAC.
Palabras clave Festival de Cine, 2016