Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Enfants Terribles estrena 12 títulos de cine independiente pa neños y xóvenes

Votos

(Total de votos recibidos 67)

(Puntuación 2,95)

et2016
• Cinco directores y trés actores van participar nos alcuentros programaos col públicu de la sección más moza del FICX
• Les 18 ediciones del programa didácticu del Festival axuntaron a más de 172.000 alumnos d’Asturies, Galicia, Llión y Cantabria
• César Sánchez firma’l cartel d’Enfants Terribles qu’homenaxea a La naranja mecánica
La 19ª edición d’Enfants Terribles va ufiertar al públicu más mozu del festival doce producciones internacionales alloñaes de la distorsión comercial pa reflexonar y aldericar nel aula. Doce títulos del cine más nuevu que se ta faciendo n’Alemania, Rusia o Australia, una cuidada muestra independiente fecha a midida de neños y adolescentes, auténticos protagonistes d’esta sección, una de les señes d’identidá del FICX.
El programa más xuvenil del Festival ye un imprescindible pa la comunidá educativa d’Asturies dende va cuasi dos décades, como lo demuestren los más de 172.000 estudiantes que pasaron peles sales d’Enfants Terribles nes sos dieciocho ediciones anteriores. L’añu pasáu, esta sección contó con más de 10.603 alumnos de 111 colexos y institutos de cuasi cuarenta llocalidaes asturianes, y de Llión y Cantabria.



EL CARTEL

El cartel de la 19ª edición d’Enfants Terribles fue creáu por César Sánchez, autor tamién del de la 54 edición del FICX. Sobre esta obra, l’ilustrador asturianu comenta:

“Igual que’l cartel del FICX, ésti ta basáu nuna película de Kubrick, nesti casu La naranja mecánica. Kubrick ye ún de los mios directores favoritos y, en cuantes di cola idea d’HAL pal póster principal, siguir la estela pa Enfants surdió de forma natural y mui rápida. La hestoria d’un mozu adolescente con problemes encaxaba como un guante al ciclu y adaptábase con una continuidá natural a la idea xeneral del certame, dándo-y una identidá común. Agora puede paecer antigua o fuera de contestu, pero iconográficamente, la imaxe del güeyu manteníu a la fuerza abiertu con un aparatu d’aspectu quirúrxicu ye impactante inda anguaño”.


LA COMPETICIÓN

Como ye tradicional, van ser los mozos asistentes a les sesiones los que decidan colos sos votos qué películes van llevar los dos gallardones d’esta sección: hasta 12 años y pa mayores de 13 años. Na 19ª edición d’Enfants Terribles van concursar doce llargumetraxes llegaos d’Alemania, Francia, Bélxica, Reinu Uníu, Suecia, Suiza, Rusia, Estaos Uníos y Australia. Toos son estrenos nel nuestru país.

Coles sés oficiales nel Teatru de la Llaboral, el Xovellanos y los Cines Centru, esta sección presenta una abondante variedá de producciones que traten asuntos como la esploración del mundu adolescente, la muerte, los conflictos familiares, el trabayu n’equipu, l’erotismu o l’ansiedá sexual. Van proyectase toes en versión orixinal con subtítulos en castellanu o inglés. Habrá, como n’años anteriores, una película con doblaxe en directo al asturianu (Blinky Bill, The Movie) y con subtítulos tamién n’asturianu. Y un filme dirixíu a neños a partir de 4 años que se va proyectar con doblaxe en directo al castellanu (Molly Monster).

Ente les propuestes que recueye Enfants Terribles na so 19ª edición destaquen cintes como la dirixida por Theresa von Eltz. Película centrada nel atolladeru que puede ser l’adolescencia, 4 Kings ta protagonizada por cuatro promeses moces del cine alemán que sumen premios mesmo en festivales patrios como en Venecia o Berlín. La directora amuesa l’enfrentamientu ente formes distintes d’entender la psiquiatría y la educación na trampa sentimental que puede llegar a ser la Navidá. Llevó premiu en Roma.

Dende Estaos Uníos llega otra película sobre les preocupaciones básiques de la pubertá. Slash, de Clay Liford, ye una comedia qu’usa l’universu de los fanfic p’abordar la identidá y l’ansiedá sexual nos adolescentes y tamién l’arguyu de ser diferentes.

Nel trance d’atopar el so sitiu nel mundu tamién s’atopa la protagonista de Girl Asleep, anque la so directora, Rosemary Myers, quier esplorar el mundu de la pubertá poniendo’l focu nuna quinceañera que nun quier dexar la so infancia en pos d’un mundu incomprensible, eróticu y violentu. La ópera prima d’esta realizadora australiana fue premiada en Seattle, Adelaida y Melbourne, y pa una parte de la crítica ye la coming of age más estraordinaria del añu.

Vincent nun ye otra comedia dramática xuvenil, sinón qu’aprovecha’l pánicu enfermizu que’l protagonista siente poles emisiones de carbonu pa falanos del sentimientu d’incomprensión qu’arrebata l’adolescencia y de la necesidá de pasar los problemes familiares. Tres de l’aclamada Moscow, Belgium, el director Christophe van Rompaey compón en Vincent un esperanzador retratu d’un mozu que nun ve otra solución al calentamientu global que’l so propiu suicidiu.

A los siguidores del FICX va gusta-yos volver a ver na gran pantalla al iconoclasta Gustave Kervern (Louise-Michel, Mammuth). Nesta ocasión dientro del elencu de Cigarettes et Chocolat Chaud, ópera prima de la montadora Sophie Reine, que constrúi una comedia sólida con un padre solteru obligáu a facer un cursu de responsabilidá parental.

El públicu d’Enfants Terribles va tener la oportunidá de ver la nueva entrega cinematográfica –la sesta- de la popular saga lliteraria Las Fieras Fútbol Club, creada pol escritor y director Joachim Masannek. The Wild Soccer Bunch- The Legend Lives! ta basada na propia esperiencia del director como entrenador d’un equipu de fútbol infantil n’Alemania y fala de la importancia del deporte como escuela pa la vida y de la necesidá del trabayu n’equipu.

Chicken llega al cine depués d’un debut exitosu na escena independiente londinense (producción teatral y cinematográfica comparten amás protagonista, Scott Chambers, que va participar nos alcuentros d’Enfants Terribles xunto al director de la película). La ópera prima de Joe Stephenson va competir en Xixón depués del so pasu trunfal por Giffoni con estes credenciales: la vida nos márxenes de la sociedá y los malos tratos na familia y les sos terribles consecuencies.

Otra adaptación lliteraria: Blinky Bill, The Movie. Esti koala ye ún de los personaxes más célebres de la lliteratura infantil australiana y debuta nel cine amparáu por cuatro nomes mui respetaos na animación americana: Deane Taylor (director d’arte de Vaca y pollo o Pesadilla antes de Navidad), Noel Cleary (miembru de la factoría Disney en títulos como Caminando entre dinosaurios, Tarzan & Jane o Bambi II), Alex Weight (Happy Feet, rompiendo el hielo) y Alexs Stadermann (El libro de la selva 2). Esta película va doblase al asturianu.

L’apueste d’Enfants Terribles pol cine d’animación concrétase con otros dos títulos: Molly Monster y Savva. Molly Monster (El regalo de Molly) ye una coproducción europea dirixida por Ted Sieger, Michael Ekblad y Matthias Bruhn. Premiada en Shanghai, esta película dirixida a los más pequeños fala de l’harmonía y l’amor familiar. Últimu productu de la saga infantil d’esti personaxe lliterariu que tien tamién serie de televisión.

La producción rusa Savva ye’l debut na dirección del compositor de bandes sonores Max Fadeev (Jack Ryan: Operación Sombra), tamién guionista d’El Rey León 2. Esti cuentu de fades en 3D ufierta a los más pequeños l’aventura de Savva que, con sólo 10 años, llánzase a lliberar al so pueblu de les garres d’unas hienes sanguinaries. La versión inglesa que va exhibir el FICX cuenta coles voces de Milla Jovovich, Sharon Stone, Joe Pesci o Whoopi Goldberg.

D’Alemania llega otru títulu cargáu de fantasía virtual. El protagonista d’Offline – Are You Ready for the Next Level? ye un espertu nun videoxuegu online al qu’otru xugador-y roba’l so avatar trunfador. Esi ye’l puntu de partida d’esta hestoria creada por Florian Schnell que plantega la necesidá de salir al mundu y tener esperiencies reales.

La competición complétase con otra producción alemana: Help, I Shrunk My Teacher. Cuasi 20 años depués del rodaxe de Cariño, he encogido a los niños, Sven Unterwaldt da-y una vuelta de tuerca al asuntu de los menguantes faciendo qu’un rapaz aminorgue al tamañu d’un bic a la odiada directora del so colexu. Ganadora d’un premiu Bambi.

ALCUENTROS COLOS DIRECTORES

El Teatru de la Llaboral, el Xovellanos y los Cines Centru van acoyer los Alcuentros mesmo con directores que con actores de les películes d’Enfants Terribles, unes cites imprescindibles colos espectadores más mozos del festival, nes que se cambien preguntes, idees y suxerencies. Nesta edición habrá alcuentros colos siguientes realizadores: Sophie Reine (Cigarettes and Chocolat Chaud), Joachim Massannek (The Wild Soccer Bunch), Theresa von Eltz (4 Kings), Florian Schenell (Offline) y Joe Stephenson (Chicken). Tamién van tar en Xixón los actores Spencer Bogaert (Vicent), Michelle Monballing (The Wild Soccer Bunch) y Scott Chambers (Chicken).


GUÍA DIDÁCTICA DIXITAL

El festival va ufiertar a los estudiantes y profesores una Guía Didáctica Dixital que da claves pedagóxiques sobre les películes d’Enfants Terribles, amás de les actividaes complementaries que s’ufierten a los escolinos. Esta publicación quier fomentar l’alderique nel aula, amás d’una mayor implicación y participación de los mozos nes proyecciones a les que van, moviendo asina’l so espíritu críticu. Va poder siguise en www.gijonfilmfestival.com.



LES ENTRAES

El preciu de la entrada d’Enfants Terribles pa los estudiantes del conceyu de Xixón va ser de 3 €, (con tresporte) o 2 € (ensin tresporte), gracies a la collaboración del Festival col Conseyu de la Mocedá de Xixón. Pa los alumnos que vaigan d’otros conceyos, el preciu de la entrada va ser de 2 €.


La sección Enfants Terribles del Festival Internacional de Cine de Xixón (19-26 payares) ta organizada pol Ayuntamientu de Xixón, al traviés de Divertia Gijón S.A., y Llaboral Ciudá de la Cultura. Patrocinen el Ministeriu de Cultura, la Conseyería d'Educación y Cultura del Gobiernu del Principáu d'Asturies y El Comercio. Collaboren Liberbank, Conceyalía de Xuventú, Conceyalía de Servicios Sociales, Conseyu de la Mocedá de Xixón, Abierto hasta el amanecer y Espaciu de Creación y Didáctica.


Enllaz al material fotográficu, videu y audiu de les películes d’Enfants Terribles y al cartel