Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

LLARGUMETRAXE DE RAMÓN LLUÍS BANDE NA SEICIÓN OFICIAL

Votos

(Total de votos recibidos 34)

(Puntuación 3,09)

cantares
Cantares de una revolución va ser el primer llargu asturianu que participe na Competición Oficial de Xixón dende va más de dos décades

• La película, un musical protagonizáu por Nacho Vegas, percuerre dalgunos de los socesos y espacios de la insurreición de los obreros asturianos n’ochobre de 1934
Ramón Lluís Bande torna a la competición del Festival Internacional de Cine de Xixón: el so llargumetraxe últimu, Cantares de una revolución, va tar na Seición Oficial: ye’l primer llargumetraxe asturianu dende va más de dos décades en participar nel emblemáticu apartáu del FICX, nel que tamién van competir les películes últimes de Yorgos Lanthimos y Hong Sang-soo. Fiel al so carauterísticu cine resistente, el direutor asturianu, cola complicidá del músicu Nacho Vegas, percuerre dalgunos de los socesos y escenarios más significativos de la insurreición de los obreros y la xente del campu asturiano n’ochobre de 1934, nel momentu en que se cumple’l so 84 aniversariu. Xixón va ufrir la première mundial d’esta película.

En Cantares de una revolución, Vegas percuerre dalgunos de los sitios más representativos de la última revolución proletaria n’Europa occidental, cola música popular como mapa y les palabres de Belarmino Tomás, presidente del Tercer Comité Revolucionariu, como brúxula: "Trabayando coles palabres de Belarmino Tomás –pa min la figura política más importante del sieglu XX n’Asturies– y colos cantares populares nacíos de la propia insurreición, atopé una forma cinematográfica que me permitía averame d’una manera mui procurosa a lo que foi la revolución", comenta Ramón Lluís Bande.

El llargumetraxe últimu del realizador xixonés ye una película cantada, contada y lleída: “Filmar persones lleendo –tamién cantando– siempre me paeció un recursu mui cinematográficu, pesie a lo qu’avecen dicir los profesionales y los manuales. Planos estáticos onde daquién llee –o canta– énte la cámara, cola voz abellugada pol soníu natural del espaciu nel que llee, radicalmente venceyáu col conteníu del testu lleíu, como un mou d’invocar el pasáu nel presente".

La película cuenta los primeros momentos de la revolución del 34 n’Asturies, cola toma de los cuarteles en Sama; la entrada de los Regulares n’Uviéu; la destruición de la Universidá; l’asesinatu d’Aida de la Fuente; l’alcuentru ente Belarmino Tomás y el xeneral López Ochoa pa "organizar la paz" o el discursu del mesmu Tomás nel balcón de la casa conceyu de Sama rindiendo la revolución.
A lo llargo d’esti viaxe, Nacho Vegas interpreta, adaptaos o reescritos, ocho cantares populares de la revolución, como Una mañana, Asturias, tierra bravía, Aida de la Fuente o Asturies desventurada.

Cantares de una revolución propón una puesta n’escena diferente a la de los títulos últimos del direutor, presentaos tamién nel 55FICX, Escoréu, 24 d’avientu de 1937 y Aún me quedan balas para dibujar, colos que participó na Competición Internacional Rellumes y na Seición Oficial de Curtiumetraxes, respectivamente). D’esta miente, Bande cortexa con delles carauterístiques d’un tipu de ficción desdramatizada. El realizador esplica que "hai una puesta n’escena falsamente teatral qu’atalanto que funciona mui bien pa crear el distanciamientu necesariu ente lo contao y l’espectador".

En Cantares de una revolución, el públicu va atopar munches de les constantes estétiques y étiques del cineasta xixonés. Él mesmu les apunta: "L’emplegu del planu-secuencia, la duración, el focu na memoria política comunal de les y los asturianos; la dialéutica pasáu-presente nel rexistru de los espacios naturales; la utilización de material d’archivu, dende la conciencia de que ye elli quien nos mira y quien ta llamándonos seliquino, más que nosotros a él; el protagonismu, equí cuasi absolutu, de la música popular, y la memoria oral que, anque nesti casu nos llegara escrita, nun primer momentu foi palabra falada".
Palabras clave Festival de Cine, 2018