Aceptar

Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

ENFANTS TERRIBLES VA PRESENTAR N’ESPAÑA’L CINE INFANTIL Y XUVENIL MÁS ESTIMULANTE
DE LA TEMPORADA

Votos

(Total de votos recibidos 47)

(Puntuación 2,84)

rdpenfants
• La seleición bien procurosa va amosar once películes a concursu, y va incluir tres títulos fuera de competición
• Pel momentu, cuatro directores confirmaren yá la so participación nos alcuentros programaos col públicu de la seición más moza del FICX
• El programa didáutico del Festival de Xixón reunió a lo llargo de la so historia a más de 200.000 alumnes y alumnos d’Asturies, Galicia, Llión y Cantabria

La edición númberu ventiún d’Enfants Terribles va ufrir al públicu más mozu del FICX catorce producciones internacionales, tres d’elles fuera de competición, alloñaes de la hexemonía de Hollywood pa esfrutar nes sales y madurar nes aules. Una muestra del cine pa rapacines y rapacinos y p’adolescentes que se ta faciendo en países como Francia, Reinu Xuníu, Alemaña, Islandia, Estonia o Canadá, y que va vese equí por primer vez n’España. Una seleición fecha con munchu procuru y a medida de les y los auténticos protagonistes d’esti apartáu, continuadora del espíritu orixinal del Festival Internacional de Cine de Xixón y una de les sos marques d’identidá.

El programa infantil y xuvenil del Festival ye un eventu imprescindible pa la comunidá educativa d’Asturies dende va dos décades, como lo afiten les y los más de 200.000 estudiantes que pasaren peles sales d’Enfants Terribles. Esta seición ye una parada casi obligatoria nel calendariu d’actividaes de colexos ya institutos non solo asturianos, sinón tamién de Castiella y Llión, Galicia y Cantabria, que motiva al profesoráu a facer usu de les proyeiciones pa debatir en clase temes d’anguaño como la multiculturalidá, la esclusión social, la educación sexual o el desarrollu personal.
Pela competición d’Enfants Terribles van pasar títulos que se presentaren, y dacuando se premiaren, en festivales como Cannes, Berlín, Toronto, Slamdance o Giffoni. Maestros de l’animación como Michel Ocelot, ganador d’Enfants Terribles en 1999 con Kirikú y la bruxa, que va tornar a Xixón cola so película última, Dilili á Paris. Tamién vuelve al FICX la prestixosa cineasta Claire Simón, col so retratu xeneracional Premières solitudes, presentada na Berlinale y tamién incluyida na Competición Internacional Rellumes; Linda Hambäck, mui aplaudida en Berlín con Gordon & Paddy, o Árni Ásgeirsson, que dirixe la superproducción Ploey – You Never Fly Alone. Amás de les óperes primes de Meryem Benm'Barek, Pascal Plante o Ed Lilly. Asinamesmo, va poder esfrutase The Breadwinner, nominada al Oscar y al Globu d’Oru y producida por Angelina Jolie. El cine español va tar presente cola coproducción hispano-dominicana Miriam miente, de Natalia Cabral y Oriol Estrada, premiada en Karlovy Vary, y que va tener el so estrenu estatal na seición Esbilla del FICX.

El cartel

El cartel d’Enfants Terribles creólu en 2018 César Sánchez, autor de la imaxe de les dos ediciones últimes. Sobre esta obra, l’ilustrador asturianu comenta: “Yo nun toi avezáu a trabayar pensando en neñes y neños, con tolo qu’eso supón, pero creo qu’a la fin lo único importante ye nun los tomar por bobos y trabayar con tola dedicación y esfuerzu. Nesti casu la premisa argumental (como nel cine), nun surdió tan rápido como n’otres ocasiones, sinón que trabayamos nuna serie d’idees previes y al final pescanciámonos de que nun funcionaben. Como siempre, lo más cenciello ye lo más efeutivo… Una tarde, demientres-y daba vueltes y roceaba qué facer, vi a la fía de la mio vecina con un globu y a la hermana con una aguya… y namás puedo lleer hasta ehí”.


La competición
Sofia, de Meryem Benm’Barek (Francia/Qatar). La ópera prima d’esta direutora marroquina algamó’l premiu al meyor guión na edición última d’Un Certain Regard, en Cannes. Pal so primer llargumetraxe, quitó’l velu que tapa un tema delicáu nel so país: la maternidá fuera del matrimoniu. La película va participar al tiempu na seición Esbilla del 56 FICX.

Fake Tattoos, de Pascal Plante (Canadá). Seleicionada en certames de prestixu como Berlín, Slamdance, Edimburgu o Buenos Aires, la primer película de ficción d’esti escritor canadiense ye una historia d’amor que conmueve, ente un punk zarraú y un espíritu llibre.

We The Coyotes, de Hanna Ladoul y Marco La Via (Francia/Estaos Xuníos), presentada en Cannes y que cuenta les 24 primeres hores de la vida nueva d’una pareja moza en Los Ángeles con planes medio iguaos y bolsos medio vacíos.

Gordon & Paddy, de Linda Hambäck (Suecia). Presentada en Berlín y Toronto, ta basada nun clásicu de la lliteratura infantil sueca. Les voces de Stellan Skarsgard (Los vengadores) y Melinda Kinnaman (Bron) acompéñennos nesta prestosa historia de detectives protagonizada por animales encantadores.

Ploey – You Never Fly Alone, de Árni Ásgeirsson (Islanda/Bélxica). Esta aventura ablucante d’altos vuelos na llinia de PIXAR y Dreamworks yá se vio en más de 20 países. El protagonista ye un paxarín mui nuevu y aparentemente un poco pañín que tien qu’arregláseles y bregar pa superar los sos mieos y salir alantre.

Premières solitudes, de Claire Simon (Francia). Esta direutora de referencia del cine francés d’anguaño torna al FICX (compitió na Seición Oficial en 2006) con un retrato mui finu de les y los adolescentes d’un institutu de les afueres de París. La película tamién va participar na Competición Internacional Rellumes.

Un corazón estraordinariu, de Marc Rothemund (Alemaña). El direutor de la ganadora del Oscar Sophie Scholl: Los últimos díes, xunta a un bon vivant trentañeru con un adolescente que carez una enfermedá cardiaca seria pa grabar una historia sobre’l sentíu de la responsabilidá.

Les rois mongols, de Luc Picard (Canadá). Esta adautación d’una novela de Nicole Bélanger, ufre una visión cabal de la reciella nel mundu de les y los adultos: cuatro primos garren un rehén pa reclamar el so derechu a escoyer el so futuru, inspirándose nos actos terroristes del Frente de Lliberación de Quebec.

Captain Morten and The Spider Queen, de Kaspar Jancis, Henry Nicholson y Riho Unt (Estonia/Irlanda/Gran Bretaña/Bélxica). Película desarrollada nel estudiu d’animación en stop-motion más antiguu del mundu, en Tallin, ya inspirada en La metamorfosis de Kafka, apurre un mensaxe a favor de siguir siendo fiel a los suaños pesie a qu’esista xente que quier quitatelos. Cola voz dura de Brendan Gleeson.

VS., de Ed Lilly (Gran Bretaña). A este realizador mozu señalólu la BBC como ún de los talentos nuevos británicos, y robla un drama sobre un adolescente adoptáu que cimbla al borde de l’autodestrucción y que atopa la so voz propia nel mundu del rap británicu.

Miriam miente, de Natalia Cabral y Oriol Estrada. (República Dominica/España). Coproducción sobre la tradicional celebración de los 15 años que se fai nel país caribeñu, qu’algamó una mención del xuráu en Karlovy Vary. Crónica íntima de l’adolescencia dominicana, entemecida con una crítica dura a una sociedá onde tovía añeren el clasismu y el racismu.


Fuera de competición:
Dilili en Paris, de Michel Ocelot (Francia). La xoya animada nueva del direutor de Kirikú y la bruxa llévanos al París de la Belle Époque pa siguir a una detective mui nueva qu’investiga los raptos de moces na Ciudá de la Lluz. Película tan cautivadora que The Hollywood Reporter fala d’ella como “un misteriu cultural maraviyosu”.

Old Boys, de Toby MacDonald (Gran Bretaña/Suecia). El direutor del curtiu premiáu Je t’aime John Wayne, aporta al llargumetraxe con una revisión del clásicu Cyrano de Bergerac, ambientada nuna escuela, onde un estudiante raru ya imaxinativu ayuda al héroe de la clase, dalgo fatu, a conseguir arimase a la fía d’un profesor visitante de francés.

The Breadwinner, de Nora Twomey (Canadá). Producida por Angelina Jolie. Con esta película sobre una rapacina que se fai pasar por neñu nel Afganistán baxo control Talibán, la direutora algamó la so segunda nominación al Oscar a la meyor película d’animación, y foi tamién candidata a los Globos d’Oru.

Alcuentros coles y colos artistes
Les sedes d’Enfants Terribles van acoyer otra vuelta los Alcuentros coles y colos artistes, onde que non solo s’intercambien entrugues sobre cine, sinón tamién sobre los temes centrales de les películes. Trátase de fomentar un intercambeu d’impresiones que mueva’l el sentíu críticu de les y los pequeños espectadores. Hasta’l momentu, yá se confirmaren alcuentros coles y colos realizadores que vienen darréu: Kaspar Jancis (Captain Morten and The Spider Queen), Ed Lilly (VS.) y Natalia Cabral y Oriol Estrada (Miriam miente).

La guía didáutica
Uno de los clásicos d’Enfants Terribles ye la guía didáutica que’l FICX pón a disposición de los centros participantes, qu’apurre más información sobre caúna de les películes de la seición. Esta guía val bien como ferramienta de sofitu pa preparar la visita al festival en clas, amás d’ufrir pautes y actividaes didáutiques pa trabayar dempués de veles nel FICX. Estes guíes, editades pol escritor y críticu Jesús Palacios, van tar disponibles en formatu dixital na web del festival. Van unviase amás a los colexos ya institutos per corréu electrónicu y tienen l’ apoyu del Departamentu d’Educación del Conceyu de Xixón. L’oxetivu ye que les y los participantes n’Enfants Terribles deprendan a lleer el cine y a familiarizase con una aproximación cenciella al llinguaxe audiovisual, asina como promover el séptimu arte como preséu pedagóxicu.

Oficios del cine
Esti añu, nuevamente, como parte de la ufierta d’alfabetización audiovisual, les alumnes y alumnos participantes n’Enfants Terribles, van tener la oportunidá de descubrir, de la mano de delles personalidaes de la industria cinematográfica, una pluralidá de perfiles profesionales que formen parte de cualesquier producción cinematográfica. Unos oficios xeneralmente menos conocíos pol públicu más mozu y que yá cuntaren, en 2017 con presencies como’l direutor y productor arxentinu Lisandro Alonso, el realizador asturianu Samu Fuentes o l’atrezzista Fito Llorente ente otros. Oficios de cine faise gracies a la iniciativa y collaboración del Departamentu de Mocedá de la FMCEyUP y el Conseyu de la Mocedá de Xixón.

Talleres
En 2017, el FICX entamó una collaboración bayurosa col Festival Internacional de Cine de Clermont-Ferrand nes sos actividaes d’alfabetización audiovisual. Dempués del éxitu del añu pasáu, nesta edición va desarrollase otra vuelta’l taller Mesa de lluz virtual.

Mesa de lluz virtual ye un taller que ufre a les alumnes y alumnos la posibilidá de trabayar con una aplicación dixital qu’imita les carauterístiques d’una mesa de lluz, esto ye, tresforma la pantalla nun llenzu en blanco onde les y los participantes pueden emplegar pinceles pa dibuxar una escena d’una película d’animación.
Col sofitu del Conseyu de la Mocedá del Principáu d’Asturies y del Conseyu de la Mocedá de Xixón, el FICX va poner a disposición de l’alumnáu diez equipos informáticos. Los derechos d’uso de les aplicaciones, propiedá de Clermont-Ferrand, cédense de baldre.

Taller Aula de Cine
Aula de cine ye una iniciativa creada por Laboral Cinemateca col envís d’ufrir una educación específica nel arte de la cinematografía, ofreciendo a la comunidá educativa un recursu didáuticu que permite al profesoráu esplicar nel aula venti conceutos básicos y fundamentales del arte cinematográficu, ilustraos con fragmentos de películes destacaes de la historia del cine y bio-filmografíes de les y los direutores. Esta actividá va ponela la crítica y escritora Violeta Kovacsics.
L’Aula de Cine de Laboral Cinemateca ye un recursu p’aniciar a la mocedá nel arte fílmicu. Inclúi amás esti recursu educativu una periodización básica de la historia del cine y una clasificación elemental de los xéneros cinematográficos. Los conteníos del Aula de Cine desarrolláronlos ex profeso Fernando de Felipe Allué y Joan Marimón Padrosa, dos reconocíos especialistes de la docencia y la crítica de cine que tienen muncha esperiencia cinematográfica.

La finalidá de los talleres ye que l’alumnáu de los centros escolares asturianos se familiarice col preséu como un conteníu potencial del programa educativu y, per otru llau, que’l profesoráu que los acompaña na so visita a Enfants Terribles, pueda ver les aplicaciones de la plataforma en clas y motivar, d’esta mientre, pal so emplegu.


La seición Enfants Terribles del Festival Internacional de Cine de Xixón (16-24 payares) ta organizada pol Conceyu de Xixón, a través de Divertia Gijón S.A. y coproducida por Llaboral Ciudá de la Cultura. Tien el sofitu del Programa MEDIA d’Europa Creativa. Patrocinen l’Institutu de la Cinematografía y de les Artes Audiovisuales del Ministeriu de Cultura, el Gobiernu del Principáu d’Asturies y El Comercio. Collaboren Liberbank, Festival International du Court Métrage à Clermont-Ferrand, Conseyu de la Mocedá del Principáu d’Asturies, Conseyu de la Mocedá de Xixón, Conseyería d'Educación y Cultura, Conceyalía de Mocedá, Abierto hasta el Amanecer, Conceyalía de Servicios Sociales, Fundación Mar de Niebla y Conceyalía d’Educación y Cultura.

Palabras clave Festival de Cine, 2018